InfoHub Logo

Aqtóbe qalasynyń irgesindegi Lesnoı eldi mekeninde turatyn 100-den astam bala 12 shaqyrym qashyqtyqta ornalasqan mektepke taksımen qatynap júr. Joǵary synyp oqýshylary qoǵamdyq kólikpen, al kóligi bar aýyl turǵyndary kórshileriniń balalaryna eki aptadan beri taksı qyzmetin kórsetýge májbúr. Sebebi, mektep avtobýsynyń júrgizýshisi jumystan shyǵyp ketken.

Aqtóbe qalasynyń irgesindegi Lesnoı aýylynyń 118 balasy №39 jalpy bilim beretin orta mektepte oqıdy. Aýyl turǵyny Elena Lúpchenko búgin kún aıaz bolǵan soń balasyn taǵy da sabaqtan qaldyrdy. Sebebi, mektep avtobýsy 9 qańtardan beri oqýshylardy tasymaldaýdy toqtatqan.

«Osymen ekinshi apta boldy, mektep avtobýsy júrmeıdi. Olar «júrgizýshi qańtarda jumystan shyqty» dep aıtty. Qazirgi kúni kóbiniń balasy mektepke barmaıdy, sabaq oqymaıdy. Qoǵamdyq kólik Sazdy aýylynan kelerde tolyq bolyp, bizge toqtamaı ketedi. Al jol boıynda kólik toqtatqan oqýshylar 100 teńge tólep qalaǵa keledi, keıin taǵy avtobýsqa otyrady. Balalarymyzdyń qaýipsizdigine alańdaımyz. Mundaıda kópbalaly otbasy balalaryna qıyn. Men qalalyq bilim bólimine da baryp, máseleni ashyq aıttym. Olar «bilmeımiz» dep shyǵaryp saldy»,- deıdi Elena Lúpchenko.

Shalǵaı jerde turatyn balalardyń qaýipsizdigin qamtamasyz etý úshin qalalyq ákimdik mektepke avtobýs berip, ony bilim ordasynyń balansyna aýdaryp qoıǵan. Avtobýs júrgizýshisin tabý, onyń tehnıkalyq aqaýlaryn jóndetý mektep dırektorynyń mindetine júkteldi. Garajy joq, qural-saımany jetkiliksiz avtobýstyń jaıyn Aqtóbe qalasynyń ákimdigi, bilim bólimi, qalalyq jumyspen qamtý ortalyǵy, Sazdy aýyldyq okrýginiń ákimdigi biledi. Mektep dırektory Indıra Amıtjanova 25 jeltoqsan kúni áleýmettik jeliler men oblystyq gazetke habarlandyrý berip, jan-jaqty qulaqqaǵys etti. Biraq, jumys izdegenderdiń kóbi balalar tasymaldaıtyn avtobýsty júrgize almaıdy eken.

«Mektep avtobýsy bizge 2009 jyly berilgen. Sodan beri mundaı qıyndyq kezikken emes. Burynǵy júrgizýshi eki jyl buryn zeınetke shyǵyp, jumysyn ári qaraı jalǵastyrdy. Densaýlyǵy syr bergen soń óz erkimen jumystan ketti. Aldyn-ala aıtylǵan kezde áleýmettik jelilerdiń barlyǵyna júrgizýshi qajet degen habarlandyrý berildi. Adamdar keledi, olardyń keıbiri qoǵamdyq kólik júrgizgen, sol jerde ereje buzyp, zań boıynsha qyzmetinen shettetilgen. Ýaqytynda jumysqa kelmeıtin, avtobýstyń shaǵyn aqaýlaryn jóndeı almaıtyn, tipti, aıazdy kúni qyzdyryp, kólikti júrgize almaıtyndar qajet emes bizge. Sonymen qatar, kóbi 40 myń teńge jalaqysy bar jumystan bas tartady»,- deıdi mektep dırektory Indıra Amıtjanova.

Lesnoı aýylynyń 61 oqýshysy tańerteń, 57 bala  tústen keıin bilim alady. Joǵary synyp oqýshylary qoǵamdyq kólikpen qatynap júr. Al bastaýysh synyp balalary taksımen, aýyl turǵyndarynyń qamqorlyǵymen mektepke jetip qalady.

«Kún salqyn kezde keıbir balalar sabaqqa kelmeı qalady. Olarǵa habarlasyp, sebebin bilip otyramyz. Al keshigip kelgen oqýshylarǵa keshirimmen qaraımyz. Jaýapkershiligi bar ata-atalar balalaryn sabaqtan qaldyrmaıdy. Kóp degende 2-3 bala qalyp qoıyp júr sabaqtan»,- deıdi Indıra Amıtjanova.

Mektep dırektory bar jumysty jıyp qoıyp, mektep júrgizýshi izdeýmen aınalysyp jatqanyn jetkizdi. Ol birer kúnde avtobýs balalar tasymaldaýdy ári qaraı jalǵastyratynyn aıtyp sendirdi.

Altynaı Saǵyndyqova

QazAqparat

---