InfoHub Logo

Aqtóbede «Iandeks.Taksı» arqyly jolǵa shyqqan áıel jol apatynan zardap shekti. Oqıǵa saldarynan áıeldiń qabyrǵasy synǵan. Bul týraly «Dıapazon» basylymyna silteme jasap Infohub.kz aqparat agenttigi habarlaıdy.

Jas aqtóbelik áıel ulymen birge «Iandeks.Taksı» qosymshasy arqyly kólik shaqyrǵan. Olardy 27 jastaǵy taksı júrgizýshisi Chevrolet Cobalt avtokóligimen tasymaldaǵan. Neregýlırýemyı qıylystan ótken kezde júrgizýshi basqa kólikke jol bermeı, soqtyǵysqan. Apat ornynan taksı jolaýshysy aýrýhanaǵa jetkizilgen. Soqqydan áıeldiń úsh qabyrǵasy synǵan.

Jol erejesin buzǵany úshin sotqa tartyldy

Jol erejesin buzǵany úshin taksı júrgizýshisi sotqa tartyldy. Oǵan QR QK-niń 345-baby (Adam densaýlyǵyna aýyr nemese ortasha aýyrlyqtaǵy zıan keltirýge nemese adam ólimine ákep soqqan jol júrisi nemese kólik quraldaryn paıdalaný qaǵıdalaryn buzý) boıynsha aıyp taǵyldy.

Júrgizýshi jol erejesin buzǵanyn tolyq moıyndap, jábirlenýshige dári-dármek pen medısınalyq qyzmetke ketken shyǵyndaryn ótegenin aıtty. Ol otbasynda jalǵyz asyraýshy ekenin, áıeli epılepsıamen aýyratynyn alǵa tartyp, qatań jazalamaýdy surady.

Moraldyq shyǵyn talaby

Sotta jábirlenýshi áıel taksıde alǵan jaraqatynan uzaq ýaqyt boıy qozǵala almaı, dem ala almaı, tamaqtana almaı qınalǵanyn aıtty. Onyń aıtýynsha, eki aı boıy jumys isteı almaǵandyqtan, nesıelerin tóleý úshin alǵan qaryzdary kóbeıip qalǵan. Áıel kináli taraptan moraldyq shyǵyn retinde 500 myń teńge óndirip berýdi talap etti.

Sot taksı júrgizýshisin 80 saǵattyq qoǵamdyq jumysqa tartý jáne bir jylǵa júrgizýshi kýáliginen aıyrý týraly úkim shyǵardy. Sondaı-aq, sot kináli tarapty jábirlenýshi jolaýshyǵa moraldyq shyǵyn retinde 500 myń teńge tóleýge mindettedi.