Bar edi bir zeńgir taý asqan bıik,
Ár túrli meken etken ańdar súıip.
Jol shekken tamaq izdep ash Arystan
Sol taýdyń arasynan qýdy Kıik.
Jaqyndap júrdi Arystan jetemin dep,
Oılaıdy tústik tamaq etemin dep.
Keledi Kıik jylap bir Qudaıǵa,
Qaıtkende munan aman ketemin dep.
Jylasań shyn zaryǵyp bir Qudaıǵa,
Oılama qalady dep zaryń jaıǵa.
Janynan Kıik kúder úzgen shaqta,
Ekeýi kez bolady tereń saıǵa.
Qýandy saıdy kórip endi Kıik,
Saılandy óteıin dep kúshin jıyp.
Zyrqyrap atqan oqtaı óte shyqty,
Arystan qala berdi ishi kúıip.
Sol jerde Túlki keldi Arystanǵa:
«Jyǵasyń, - dedi, - bárin alysqanda.
Bolarsyń dushpan túgil, dosqa kúlki,
Kıikten qalyp qoısań jarysqanda.
Aıtamyn muny saǵan dostyqpenen,
Almaımyn esh nárseńdi aldap senen.
Tıisti báıgesinen qur qalady
Keıbireý júreksizdik, bostyqpenen.
Tileseń, qoldan kelmes isiń bar ma,
Tıisti et qaıratty kúshiń barda.
Sıdıǵan jaman Kıik ótip ketti,
Uıat qoı toqtaǵanyń osy jarǵa.
Aqyrsań, ne shydarlyq aıbatyńa,
Dushpannyń qalma mysqyl ǵaıbatyna.
Tursam da saıdyń kórip tereńdigin,
Senemin ebiń menen qaıratyńa».
Jelikti myna sózge endi Arystan,
Qarǵýǵa jar shetine keldi Arystan.
Jete ashaı qarǵyǵanmen ar jaǵyna,
Túbine jardyń qulap óldi Arystan.
Túlki-ekeń qulap ólgen dosyn kórdi,
Aqyryn oıǵa túsip, jaqyn keldi.
Ataýsyz súıgen dosyn tastasyn ba,
Sol jerde keshikpeı-aq asyn berdi.
Óltirip dosyn aldap Túlki buzyq,
Jep jatyr ólisimen etin buzyp.
Bir aıdaı azyq etip Túlki jatty,
Súıegin jan dosynyń taza mújip.

* * *
Dosyń kóp tirilik pen amandyqta,
Túlkideı sóz beretin jarǵa jyqpa -
Ár iske amandyqta qaırat salyp,
Mújıtin súıegińdi jamandyqta.
Kisige taza joldas tabý qıyn,
Kóbin-aq dos etedi mal men buıym.
Dosyńnan, dushpanyńnan birdeı saqtan,
Basynda, sirá, Ahmet, bolsa mıyń.
Oılama shyn dostaryń mol eken dep,
Sózine ere berme jol eken dep.
Dosyndy qıyn iske qaırap turǵan -
Bilgeısiń shyn dushpanyń sol eken dep.

---