InfoHub Logo

Noǵaıly Asan qaıǵynyń zamanynda Asan qaıǵydan bir qyz kelip sýal surapty:

— Er adam tórtke sheıin áıel alady. Bul durys pa? —  depti. Asan qaıǵy atamyz:

— Erdiń tórtke sheıin áıel alýy durys, — deıdi. Sonda qyz aıtady:

— Bir áıeldiń tórt erkekti alýy durys pa? — deıdi. Asan qaıǵy:

— Durys emes, — deıdi. Qyz aıtady:

— Erkektiń tórt áıel alýy durys bolǵanda, bir áıeldiń tórt erkek alýy nege durys bolmaıdy? — depti. Sonda Asan qaıǵy jaýaptan toqtalyp:

— Erteń osy ýaqytta qaıta kelshi, buǵan jaýap berse Abat berer, — deıdi. Abat — Asan qaıǵynyń jalǵyz balasy eken. Abat kelgen soń Asan qaıǵy:

— Bir qyz osylaı dep sýal surady, soǵan jaýap bere almadym, — deıdi. Abat aıtady:

— Oǵan jaýap berý qıyn emes qoı. Men jaýabyn bereıin, — deıdi.

Erteń qyzdan buryn tórt túrli sıyrdy ázirletip qoıyp, qyz kelgen soń tórt sıyrdy bir shelekke saýdyryp bolyp, Abat qyzǵa aıtady:

— Osy aralasyp, qosylyp ketken súttiń myna sút myna sıyrdiki, myna sút myna sıyrdiki dep tórt aıyryp bershi, —  depti. Qyz turyp:

— Aralasyp ketken súttiń qaı sıyrdiki ekenin qaıdan bileıin, — depti. Abat:

— Olaı bolsa bir áıel tórt erkek alsa, onan bir bala týsa, ol balany tórt erkektiń qaısysynyń balasy dep aıtýǵa bolady. Álbatta, bolmaıdy. Bu sebepti bireýiniń balasy bolmaıdy. Balanyń nasaby bireýinen de birikmeıdi. Munyń úshin áıeldiń bir erkekten artyq alýǵa durys emes, — depti.

Abat ári mergen, ári batyr, ári aqyldy, bilimdi bolǵan deıdi.

---