InfoHub Logo

Astana, Almaty jáne Shymkent qalalarynyń ákimdikteri turǵyn úılerdi jańartý baǵdarlamasyn ázirleı alady,dep habarlaıdy Infohab.

Májilis Memleket basshysynyń tapsyrmasymen ázirlengen astanany jáne respýblıkalyq mańyzy bar qalalardy damytý máseleleri boıynsha zańdy ekinshi oqylymda qabyldady. Zań aıasynda 9 kodeks pen 45 zańǵa ózgerister men tolyqtyrýlar engizilgen. Qujat 2025 jyldyń 5 naýryzynda birinshi oqylymda maquldandy.

Zań arqyly astana men respýblıkalyq mańyzy bar qalalardy abattandyrý máseleleri boıynsha standarttar jetildiriledi. Olar qoljetimdi ortany qamtamasyz etýge, dızaın-kodty engizýge, sondaı-aq jergilikti ókildi jáne atqarýshy organdardyń dızaın-kodqa sáıkes quzyretterin naqtylaýǵa, stasıonarlyq emes obektilerdi ornatýǵa jáne paıdalanýǵa qatysty.

Sonymen qatar jarnama qyzmeti retteledi. Qoǵamdyq oryndarda kóshedegi aýdıojarnamaǵa, sondaı-aq trotýarlar men avtojoldardyń betine syrtqy jarnama ornalastyrýǵa tyıym salynady. Túzetýlerdiń taǵy bir blogy elordadaǵy kóshi-qondy retteý tetikterin jetildirýge baǵyttalǵan.

Qujatpen jumys barysynda depýtattar astananyń jáne respýblıkalyq mańyzy bar qalalardyń jergilikti ókildi jáne atqarýshy organdarynyń quzyretterin keńeıtýdi usyndy. Olardyń quzyreti turǵynjaı renovasıalaý baǵdarlamasyn bekitý, aýmaqtardy abattandyrý, saýda, medısınalyq, qonaq úı jáne ózge de qyzmetter kórsetý qaǵıdalaryn bekitý, qalalyq qoǵamdyq kólikte qoldanylatyn tarıftik saıasatty ázirleýmen tolyqtyrylady. 

Sondaı-aq májilismenderdiń bastamasymen kóshi-qon salasyndaǵy zańnamany odan ári jetildirý maqsatymen «ýaqytsha kóship kelýshini tirkeý» tujyrymdamasy engiziledi.

Memleket basshysynyń tapsyrmasy aıasynda «Energetıkalyq jáne komýnaldyq sektordy jańǵyrtý» ulttyq jobasyn iske asyrý maqsatymen jylý-energetıka, sýmen jabdyqtaý jáne sý burýdyń úzdiksiz jumys isteýin qamtamasyz etý úshin birinshi kezektegi ınfraqurylymdyq problemalardy sheshýge baǵyttalǵan túzetýler engizildi.