InfoHub Logo

Astanada on jyldan astam kútken LRT iske qosylýǵa daıyn. Alaıda, bul joba qala qazynasyna qomaqty shyǵyn ákeletini belgili boldy. Bir jolǵa 200 teńge tarıf belgilengenimen, júıeni ustaýǵa ketetin shyǵynnyń basym bóligin qala bıligi jabady.

Bul týraly Infohub.kz aqparat agenttigi habarlaıdy.

LRT jumysyn kim atqarady?

City Transportation Systems (CTS) kompanıasynyń basqarma tóraǵasy Asylbek Dúısebaevtyń aıtýynsha, LRT-ni jumys istetý úshin 1000-nan astam adam jumyldyrylady. Qyzmetkerlerdiń ortasha jalaqysy 500 myń teńge bolsa, jaýapkershiligi joǵary dıspecherler aıyna 700 myń teńgege jýyq tabys tabady. Al óziniń jalaqysy 1,1 mıllıon teńge ekenin Dúısebaev rastady.

Shtat tolyq emes, sheteldik mamandar tartylýda

Qazirgi ýaqytta shtat tolyq jasaqtalmaǵan. Mashınısterdi daıarlaýdan bastap, ártúrli mamandyqtar boıynsha mamandar qabyldanýda. Qyzyǵy, LRT júıesinde shamamen 300 qytaılyq maman jumys isteıdi. Kompanıa muny Ortalyq Azıada buǵan deıin mundaı kólik júıesi bolmaǵandyqtan, jergilikti ınjenerlerdiń tájirıbesiniń joqtyǵymen túsindiredi. Qytaılyq mamandarmen 10 jyldyq kelisimshart jasalǵan, biraq olardyń sanyn birtindep azaıtyp, 10 jyldyń sońyna qaraı qazaqstandyq mamandarmen almastyrý josparlanýda.

Qarjylandyrý qalaı júzege asady?

Sheteldik jáne otandyq mamandardyń eńbekaqy sharttary birdeı, tek sheteldikterge jalaqy ıýánmen tólenedi. Jobanyń negizgi qarjylandyrý kózi – jolaýshylar tóleıtin 200 teńge jáne Astana qalasy búdjetinen bólinetin sýbsıdıa. CTS basshysy LRT jobasynyń tek jolaýshylar esebinen ózin-ózi aqtaı almaıtynyn naqty aıtty. Stansıalarda dúkender men kafeler ashý josparda joq. Kompanıa táýligine 35-45 myń jolaýshy kútedi, biraq qyzmet kórsetýge ketetin naqty aılyq shyǵyndardy áli eseptep shyǵara almaǵan.

Jolaýshylar bagaj úshin qosymsha aqy tólemeıdi. Velosıpedterdi tek búktelgen kúıde ǵana alyp júrýge bolady. Astana turǵyndary úshin bir jolǵy jol júrý quny 200 teńge bolǵanymen, is júzindegi ózindik qun áldeqaıda joǵary bolady. Bul aıyrmany qala búdjeti jabady.