InfoHub Logo

Astanadaǵy №81 mekteptiń burynǵy dırektory Gúlnar Sadyqova men bas býhgalteri Aıjan Atjanova 600 mıllıon teńgege jýyq memleket qarjysyn jymqyrdy degen aıyppen sottaldy. Bul týraly Infohub.kz aqparat agenttigi habarlaıdy.

Astananyń Qylmystyq ister jónindegi mamandandyrylǵan aýdanaralyq sotynda shyǵarylǵan úkim boıynsha, 10 jyldan astam ýaqyt mektepti basqarǵan 65 jastaǵy Sadyqova 8 jylǵa, al 41 jastaǵy Atjanova 7 jylǵa bas bostandyǵynan aıyryldy.

Mektepti jeke bızneske aınaldyrǵan

Tergeý málimetterine súıensek, atalǵan tulǵalar birneshe jyl boıy mektepti jeke bıznesine aınaldyryp, memleketke orasan zor zalal keltirgen. Olar joq qyzmetkerlerge jalaqy tóleý, ruqsatsyz daıarlyq synyptaryn ashý jáne jazǵy lagerlerdi zańsyz júrgizý arqyly aqsha jymqyrǵan.

Máselen, resmı túrde tirkelgen alty qyzmetkerge jalaqy tólengenimen, olar is júzinde jumys istemegen. Bul aqshanyń bir bóligin dırektor óz qaltasyna basqan. Bul soma 28 mıllıon teńgeden asqan.

Zańsyz ashylǵan synyptar men lagerler

Mekteptiń mektepke deıingi bilim berýge ruqsaty bolmasa da, daıarlyq synyptary ashylyp, balalar oqytylǵan. Ata-analardan tek qolma-qol aqsha alǵan. Bul áreketten kelgen shyǵyn 300 mıllıon teńgeden asty. Jazǵy lagerler de osylaısha qujatsyz jumys istep, qolma-qol aqshamen júrgizilgen. Qarjylyq monıtorıń agenttiginiń málimetinshe, bul arqyly 24 mıllıon teńgege jýyq tabys tapqan.

Sheteldik muǵalimder men aqshany zańdastyrý

Dırektor sheteldik muǵalimderdi joǵary jalaqymen jumysqa tartqanymen, bólingen qarjynyń bir bóligin ózi ıemdengen. Bul soma shamamen 70-75 mıllıon teńge boldy. Al bas býhgalter Atjanovanyń shottary arqyly 175 mıllıon teńgege jýyq aqsha ótkeni anyqtaldy.

Sotta eki aıyptalýshy da kinásin ishinara moıyndap, daıarlyq synyptar men lagerlerden túsken qarajat mekteptiń qajetine, sonyń ishinde ǵımarattyń jóndeýine jumsalǵanyn aıtty. Alaıda, sýdıa Ásel Muqasheva olardy búdjet qarajatyn jymqyrý, qyzmet ókilettigin asyra paıdalaný jáne aqshany zańdastyrý baptary boıynsha kináli dep tanydy.

Gúlnar Sadyqovanyń záýlim úıi, 10 qymbat sómkesi jáne zergerlik buıymdary tárkilendi. Aıjan Atjanovanyń avtokóligi men komersıalyq nysany alyndy. Sot úkimi áli zańdy kúshine engen joq.