InfoHub Logo

Astanada ekinshi áýejaıdyń qurylysy úshin oryn belgili boldy. Elordalyq máslıhat depýtattary qalanyń Bas josparyna engizilgen ózgeristerdi bekitip, jańa nysanǵa eń qolaıly dep tanylǵan basymdylyqty aımaqty naqtylady.

Bul týraly Infohub.kz aqparat agenttigi habarlaıdy.

Bolashaq áýejaı ornalasatyn jer

Bas josparǵa engizilgen ózgeristerge sáıkes, Astanaǵa bolashaqta ekinshi áýejaı qajet bolady. Sebebi qalaǵa keletin týrıser sany arta túspek. Sarapshylar týrıserge yńǵaıly, sondaı-aq poıyz nemese LRT arqyly jetýge bolatyn, ári qustardyń ushýyna kedergi keltirmeıtin oryndy izdegen.

Nátıjesinde, elordanyń soltústik-batys baǵytynda, Shortandy kentine qaraı, Astana – Kókshetaý tas jolynyń boıynda ornalasqan aýmaq eń úzdik nusqa retinde qarastyryldy.

Usynylǵan aýmaq Astana qalasynyń shekarasynan shamamen 48 shaqyrym, al «Nurly jol» vokzalynan 73 shaqyrym qashyqtyqta ornalasqan. Arnaıy aeroekspresster iske qosylǵan jaǵdaıda, vokzaldan áýejaıǵa deıingi jol shamamen 75-80 mınýtty quraıdy dep josparlanýda.

Depýtattardyń sheshimi

Sáýlet basqarmasynyń basshysy Altynbek Ahmetovtiń baıandamasynan keıin máslıhat tóraǵasy Tabıǵat Zeınulqabden Bas josparǵa engiziletin ózgerister birneshe otyrysta talqylanǵanyn atap ótti. Depýtattar qalanyń Bas josparyna túzetýler engizý týraly sheshimdi biraýyzdan qoldap daýys berdi.

Buǵan deıingi jaǵdaı

Buǵan deıin, 2025 jyldyń jeltoqsanynda Astana ákimi Jeńis Qasymbek Astanada jańa áýejaıdyń qurylysy múmkin ekenin aıtqan bolatyn. Ol kezde elordanyń bas josparynda «áýejaıdy múmkin bolatyn qurylys úshin perspektıvaly ýchaskeler qarastyrylǵanyn» málimdegen edi. Al 15 mamyrda elorda ákiminiń orynbasary Ersin Oteshev birden birneshe yqtımal alańdy qarastyryp jatqandaryn aıtqan.