InfoHub Logo

Astanadaǵy Dıplomatıalyq qalashyqtyń (Dıpgorodok) taǵdyry belgisiz kúıinde qalýda. Qala turǵyndary arasynda aýmaqtyń buzylyp, ornyna jańa qurylystar salynatyny týraly qaýeset taraýda. Bul jaǵdaı áleýmettik jelilerde qyzý talqylanyp, kópshiliktiń alańdaýshylyǵyn týdyrýda.

Bul týraly Infohub.kz aqparat agenttigi habarlaıdy.

«Dıpgorodok» degen ne?

Astana qalasynyń sol jaǵalaýynda ornalasqan Dıpgorodok – bul resmı emes ataý. Munda negizinen dıplomattar men sheteldik mısıalardyń qyzmetkerleri turady. Aýmaq Saraıshyq jáne Qonaev kósheleriniń aralyǵynda, «Lazýrnyı kvartal» turǵyn úı keshenine qarama-qarsy, Báıterek monýmentine jaqyn jerde ornalasqan.

Dıpgorodoktyń ózindik ereksheligi – jasyl jelekke toly, ár úıdiń óz sáýlettik stıli bar. Aýmaqtyń ishinde fontany bar, qalyń aǵashtary bar jaıly aleıa bar. Bul jer kópten beri astanalyqtardyń súıikti serýendeıtin ornyna aınalǵan. Alaıda, aleıanyń ózi de jóndeýdi qajet etedi: plıtkalar men brýschatkalardyń keıbir jerleri buzylǵan.

Bolashaq josparlar qandaı?

«Astanagenplan» baspasóz qyzmetiniń habarlaýynsha, qazirgi ýaqytta Qazaqstan premer-mınıstriniń tapsyrmasymen Astananyń bas jospary qaıta qaralýda. Jańa jospar jobasy daıyn bolyp, memlekettik saraptamadan ótýde.

Jańa bas josparǵa sáıkes, Dıplomatıalyq qalashyq aýmaǵyn qoǵamdyq-iskerlik aımaqqa jatqyzý josparlanyp otyr. Bul bolashaqta munda tek turǵyn úıler ǵana emes, sondaı-aq keńseler, komersıalyq nysandar, mekemeler jáne basqa da ınfraqurylymdar paıda bolýy múmkin ekenin bildiredi. Resmı túrde aýmaqtyń tolyq joıylýy týraly ázirge aıtylmasa da, bolashaqta tyǵyz qurylystyń bolý yqtımaldyǵy joǵary.

Buǵan deıin Astananyń dál ortalyǵynda, «Máńgilik el» arkasy men «Sfera Park» elıtalyq turǵyn úı kesheni arasyndaǵy eski Zarechnyı kentiniń joıylyp jatqany týraly habarlaǵan bolatynbyz. Turǵyndardyń aıtýynsha, olarǵa úılerin bosatýǵa nebári saǵattar berilip, páter satyp alýǵa da jetpeıtin somalar usynylǵan. Turǵyndar bul jerdi memlekettik muqtajdyq degen jeleýmen kezekti turǵyn úı kesheniniń qurylysyna bosatyp jatqanyn aıtýda.