InfoHub Logo

Astanada kópten kútken jeńil relsti kólik (LRT) iske qosylǵanymen, alǵashqy kúnderi jolaýshylar tarapynan túrli shaǵymdar men kemshilikter týraly aqparattar taralýda. Jańa kólik túrine degen qyzyǵýshylyq joǵary bolǵanymen, keıbir máseleler oryn aldy.

Bul týraly Infohub.kz aqparat agenttigi habarlaıdy.

Jolaýshylar aǵyny men tyǵyzdyq

LRT iske qosylǵan alǵashqy demalys kúnderi vagondar toly boldy. Kóptegen astanalyqtar jańa kólikpen júrip kórýge, onyń qalaı jumys isteıtinin kórýge asyqty. Áleýmettik jelilerde LRT-nyń alǵashqy kúnderde-aq ózin aqtaıtyny týraly ázilder de aıtyldy. Alaıda, bul jaǵdaı vagondardyń tyǵyz bolýyna, tipti keıbir kezderi aýanyń qysylýyna alyp keldi. Keıbir jolaýshylardyń aıtýynsha, bul jaǵdaıdy aldyn ala eskerip, vagondardaǵy jolaýshylar sanyn ýaqytsha shekteý qajet bolǵan.

Qaýipsizdik máseleleri

Jýrnalısik zertteý barysynda LRT stansıalarynda týrnıketter men qaýipsizdik skanerleriniń joqtyǵy baıqaldy. Kún saıyn myńdaǵan adam jınalatyn mundaı jerler árdaıym joǵary táýekel aımaǵy bolyp sanalady. Árıne, saýda ortalyqtaryna kirgende de tekserý júrgizilmeıdi. Alaıda, metro men poıyz sıaqty jabyq keńistikterde, ásirese adam kóp ýaqytta qaýipsizdik sharalary mańyzdy.

Jolaýshylardyń minez-qulqy men ózge de máseleler

Kóptegen jolaýshylar kishkentaı balalarymen birge LRT-ǵa kelgen. Bul túsinikti jaǵdaı bolǵanymen, alǵashqy kúnderdegi adamdardyń kóptigi men tyǵyzdyq balalarǵa da qıyndyq týdyrýy múmkin. Sondaı-aq, qoǵamdyq kóliktegi elementar erejelerdi bilmeıtinder de kezdesti. Mysaly, tyǵyz vagonda rúkzakty qolda ustaý nemese alǵa qaratyp kıý artyq emes. Bir qyzyǵy, bir jolaýshynyń vagondaǵy terezeni urýǵa áreket jasaǵany týraly da habarlandy. Munyń sebebi áli anyqtalmady, múmkin aýanyń jetispeýshiliginen nemese panıkadan bolǵan shyǵar.

Ońdy jaqtary

Degenmen, barlyq jaǵdaıdy jaǵymsyz dep aıtýǵa bolmaıdy. Vagondar taza, qyzmetkerler sypaıy, kópshiligi birneshe tilde sóıleıdi. Tek ishinde aýanyń azdap qysylýy sezildi. Bul kondısıonerlerdiń tolyq qýatpen jumys istemeýinen nemese áli kúnge deıin kóp adamǵa shamasy kelmeýinen bolýy múmkin. Jalpy, qala men turǵyndardyń LRT-ǵa áli de úırenýi kerek ekeni kórinip tur.