InfoHub Logo

Astanada 10 naýryzda aýa raıynyń kúrt nasharlaýyna baılanysty oqýshylardyń bir bóligi mektepke barmaı, úıden bilim alatyn boldy. Bul týraly qalalyq bilim basqarmasy habarlady.

Baspasóz qyzmetiniń málimetinshe, ekinshi aýysymdaǵy 0-6 synyp oqýshylary qashyqtan oqytý formatyna aýystyrylady.

"Aýa raıynyń qolaısyzdyǵyna (jeldiń kúsheıýi) baılanysty 10 naýryzda ekinshi aýysymdaǵy 0-6 synyp oqýshylary qashyqtan oqytý formatyna kóshedi", - delingen vedomstvo habarlamasynda.

Astanadaǵy aýa raıy boljamy

Buǵan deıin «Qazgıdromet» sınoptıkteri Astana jáne Almaty qalalaryna arnalǵan aldaǵy úsh kúnge – 10, 11 jáne 12 naýryzǵa arnalǵan aýa raıy boljamyn usynǵan bolatyn.

10 naýryzda elordada aıyrylmaly bultty, ýaqytymen qar, boran, tuman kútiledi. Soltústik-batys jel soǵady, ekpini 15-20 m/s, kúndiz keıde 23 m/s jetedi. Aýa temperatýrasy túnde -8...-10, kúndiz -6...-8 gradýs bolady.

11 naýryzda Astanada aıyrylmaly bultty, túnde qar, boran bolady. Ońtústik-batys jel soǵady, ekpini 15-20 m/s. Túnde aýa temperatýrasy -25...-27, kúndiz -13...-15 gradýsqa deıin tómendeıdi.

12 naýryzda elordada bultty, qar men boran kútiledi. Ońtústik-batys jel soǵady, ekpini 15-20 m/s, keıde 23 m/s jetedi. Túnde aýa temperatýrasy -13...-15, kúndiz -3...-5 gradýs bolady.