InfoHub Logo

Mektep dırektorlarynyń qyzmetine qatysty mańyzdy ózgerister engizilýi múmkin. Oqý-aǵartý mınıstri Juldyz Súleımenovanyń aıtýynsha, bul laýazym endi ómir boıy atqarylatyn qyzmet bolmaıdy. Mınıstr bul jańalyqty 24.kz telearnasynyń "Túıin" baǵdarlamasynda jetkizdi.

Bul týraly Infohub.kz aqparat agenttigi habarlaıdy.

Qazirgi tańda mektepterdegi basqarý júıesin jańartý jumystary júrip jatyr. Mınıstrdiń pikirinshe, mektep dırektory qyzmeti – burynǵydaı zeınetke shyqqansha atqaratyn turaqty laýazym emes. "Zaman ózgerdi, basqarý tásilderi de jańardy. Mektep dırektorlyǵy – ómir boıy otyratyn qyzmet emes. Bul laýazymǵa umtylatyn bilikti, bilimdi, shyǵarmashyl muǵalimder kóp. Sondyqtan sol talantty ustazdardyń arasynan myqty menedjerler shyǵatyndaı júıe qalyptastyrýymyz kerek", – dedi Juldyz Súleımenova.

Dırektorlardyń qyzmet merzimine shekteý

Aldaǵy ýaqytta mektep dırektorlarynyń bir orynda uzaq ýaqyt jumys isteýine shekteý qoıý máselesi qarastyrylýda. Usynylyp otyrǵan júıe boıynsha, qala mektepterinde dırektorlar aldymen eki jyl qyzmet etedi. Eger olardyń jumysy oń baǵalansa, taǵy eki jylǵa qyzmet merzimi uzartylýy múmkin. Osylaısha, bir mektepte dırektordyń eń uzaq jumys isteý merzimi tórt jyl bolady.

Al aýyl mektepterinde dırektordyń qyzmet merzimi alty jylǵa deıin sozylýy múmkin. Bul bastama qazir arnaıy jumys tobynyń qaraýynda.

Mınıstrdiń aıtýynsha, bul jańalyqtar boıynsha naqty sheshim kelesi oqý jyly bastalǵanǵa deıin qabyldanýy yqtımal. Buǵan deıin Juldyz Súleımenova muǵalimderdiń jas ereksheligine qatysty máselelerge toqtalǵan bolatyn. Onyń sózinshe, jasy úlken pedagogter keıbir jaǵdaıda sıfrlyq tehnologıalardy meńgerýde qıyndyqtarǵa tap bolady, bul bilim sapasyna áser etýi múmkin.