InfoHub Logo

Astanada ótetin toıǵa barý úshin bılet alǵan Jetisý oblysynyń 16 turǵyny kútpegen jaǵdaıǵa ushyrady. Saltanatty sharanyń bolmaı qalýyna baılanysty jolaýshylar áýe bıletterin qaıtarmaq bolǵanda, olarǵa tıisti aqshasy tolyq qaıtarylmady.

Bul týraly Infohub.kz aqparat agenttigi habarlaıdy.

Bılet qunynyń az bóligi ǵana qaıtaryldy

Tutynýshylardyń quqyqtaryn qorǵaý komıtetiniń málimetinshe, Jetisý oblysy men Almaty qalasynyń turǵyndary otbasylyq jıynǵa qatysý úshin Astanaǵa 16 áýe bıletin satyp alǵan. Jalpy bıletterdiń quny 765 248 teńge boldy. Alaıda, otbasylyq jaǵdaılarǵa baılanysty toıdyń bolmaıtyny belgili bolǵan soń, jolaýshylar ushýdan bas tartyp, bıletterin qaıtarýǵa ótinish bildirdi. Bul sheshimdi olar reıske 37 kún qalǵanda qabyldaǵan.

Jolaýshylar bılet quny tolyq qaıtarylady nemese áýe tasymaly erejesinde kórsetilgen az ǵana ustap qalýmen qaıtarylady dep kútken. Alaıda, olarǵa jalpy somanyń ornyna bar bolǵany 14 840 teńge qaıtaryldy. Bul ár bıletke shaqqanda nebári 927,5 teńgeden keledi.

Tutynýshylar quqyǵy qorǵaldy

Mundaı ótemaqy mólsherimen kelispegen turǵyndar Jetisý oblystyq Saýda jáne tutynýshylardyń quqyqtaryn qorǵaý departamentine júgindi. Departament mamandary istiń mán-jaıyn zerttep, azamattarǵa quqyqtyq kómek kórsetti. Olarǵa tutynýshylar quqyǵyn qorǵaý týraly zań talaptary túsindirilip, satýshy kompanıa men áýe tasymaldaýshynyń atyna qarajatty tolyq qaıtarý týraly sotqa deıingi shaǵym daıyndaýǵa kómek berildi.

Nátıjesinde, departament aralasqannan keıin másele sotqa deıin rettelip, eki táýlik ishinde tutynýshylarǵa 765 248 teńge tolyq kólemde qaıtaryldy. Departament ókilderi mundaı jaǵdaılar jıi kezdesetinin eskertip, azamattarǵa bılet satyp alarda tarıf sharttaryn muqıat oqýǵa keńes berdi.