InfoHub Logo

Aýyl mektepteri qala mektepterinen 2 jylǵa artta qalyp qoıǵan. Bul týraly búgin QR Bilim jáne ǵylym mınıstri Erlan Saǵadıev Almatyda ótken Ǵylym qyzmetkerleri kúnine arnalǵan «Ǵylym jáne bıznes» halqaralyq forýmy barysynda aıtty.

Mınıstrdiń aıtýynsha, bilim berý júıesine engizilgeli otyrǵan jańa baǵdarlama aýyl men qala mektepteriniń arasyndaǵy artta qalýshylyqty qysqartýǵa baǵyttalǵan.

«Bizdiń basty mindetimiz - qala men aýyl mektebiniń arasyndaǵy artta qalýshylyqty joıý. Ekonomıkalyq yqpaldastyq jáne damý uıymy (EYDU) elderi arasynda aýyl mektebi qala mektebinen fýnksıonaldy saýattylyq boıynsha 8 synypqa qaraı 1 jylǵa kesh qalǵan bolsa, Qazaqstan mektepteri eki jylǵa kesh qalyp qoıǵan. Búgin osy maqsatta aldymyzda úlken mindet tur. EYDU elderi aýyl mektebiniń mazmunyn 1980 jyldary jańǵyrta bastady. 1990 jyldary reforma tolyq júzege asyryldy. 1997 jyly olar bilim berý sapasyn anyqtaý júıesin engizdi. Atalǵan baǵdarlamaǵa 70 eldiń bilim berý júıesi qatysty», - dedi mınıstr.

Erlan Saǵadıev jańa bilim berý mazmunyna Qazaqstan mektepteri bıyl 1 qyrkúıekten kóshe bastaıtynyn jetkizdi.

Baǵdarlama Nazarbaev zıatkerlik mektebinde aprobasıadan ótken. Bıyl jazda 73 myń oqytýshy qaıta oqytylyp, jańa júıege 350 myń oqytýshy men 3 mln oqýshy qatysady.

«Baǵdarlama bólke nan emes, ony bir jerin kesip alyp tastaýǵa bolmaıdy. Bul úlken ǵylym. Bala bastaýysh klastardan fýnksıonaldy saýattylyq negizderin meńgerýi tıis. Negizgi maqsat - aýyl men qala mektebiniń deńgeıin teńestirý. Bıyl 1 synyp oqýshylary 1 maýsymǵa deıin oqıdy. Bul óz kezeginde 5 kúndik bilim berý júıesine kóshýdi bildiredi. Keler jyly atalǵan baǵdarlamaǵa 2,5,7 synyptar kóshedi. 9 synyptar da kóshýi yqtımal», - dedi mınıstr.

---