InfoHub Logo

Parlament Májilisiniń jalpy otyrysynda palata depýtattary «Qazaqstan Respýblıkasy men Halyqaralyq Qaıta Qurý jáne Damý banki arasyndaǵy Qaryz týraly kelisimdi (Orta bilim berýdi jańǵyrtý jobasy) ratıfıkasıalaý týraly» zań jobasyn maquldady.

«Zań jobasy Elbasynyń «Ult jospary - 100 naqty qadam» baǵdarlamasynyń 76-shy qadamynda orta bilimdi damytý boıynsha berilgen tapsyrmaǵa sáıkes keledi. Joba boıynsha jalpy shyǵyn 75 mln AQSH dollaryn quraıdy. Taza qaryz somasy - 67 mln dollar jáne de salyq tóleý úshin respýblıkalyq búdjetten 8 mln dollar qosa qarjylandyrý qarastyrylǵan. Qaryzdy óteý merzimi - 17 jyl, onyń ishinde 5,5 jyl jeńildik merzimi. Iaǵnı jobany júzege asyrý barysynda alǵashqy bes jarym jylǵa tólem jasaýdan bosatý qarastyrylǵan. Jalpy usynylǵan jobanyń maqsaty - orta bilim júıesiniń sapasyn kóterý,  bilim berýdegi qoljetimdik pen teńdikti arttyrý bolyp tabylady», - dep toqtaldy  QR Bilim jáne ǵylym mınıstri.

QR Parlamenti Májilisinde zań jobasyn qarastyrý  barysynda birqatar mańyzdy usynystar berildi. Osyǵan baılanysty Bilim mınıstrligi berilgen usynystar boıynsha sharalardy qaıta qarastyryp, depýtattardyń usynystaryn eskerdi.

«Aýyl mektepterin mýltımedıalyq jabdyqtaý, atap aıtqanda kompúter, proektor jáne ekrannan jınalǵan komplektter eskerilgen. Oǵan shamamen 16 mlrd (67%) teńge bólinedi. Búgingi kúni mektepterdiń 29 paıyzy ınteraktıvti jabdyqtarmen qamtylǵan. Joba aıasynda mýltımedıalyq komplektilerdi 16 250-den 32 500-ge jetkizý arqyly 5 400 mektep osy jabdyqtarmen qamtamasyz etiledi. Bilim berýdi sıfrlandyrý kezinde bul óte ózekti jáne tıimdi bolyp tabylady», - dep túsindirdi E. Saǵadıev.

Joldaýda kórsetilgen Pedagogıkalyq bilim berýdi damytý boıynsha tapsyrmany oryndaý maqsatynda pedagogıkalyq kadrlardy daıyndaıtyn ýnıversıtetter úshin 47 bilim berý baǵdarlamasy engiziletin bolady. Sonymen qatar osy ýnıversıtetterdi Interaktıvti jabdyqtarmen qamtamasyz etiledi. Buǵan 457 mln teńge jumsalady (qaryzdyń 1,8 paıyzy) .

Sonymen qatar bilim salasynyń pedagogıkalyq jáne basqarý potensıalyn arttyrýda 200-den astam aýyl mektepteriniń muǵalimderi men dırektorlaryn aqparattyq-kommýnıkasıalyq tehnologıalar boıynsha saýattylyq jáne menedjmentke mýltımedıalyq resýrstar arqyly oqytamyz. Oǵan 5 mlrd teńge (21%) qarastyrylǵan. 

«Kelisimniń taǵy bir mańyzdy baǵyttarynyń biri  - Inklúzıvti bilim berýdi qoldaý.  Jobada erekshe bilim qajettilikteri bar balalardy kásibı-mamandyqqa daıarlaý boıynsha arnaıy oqý baǵdarlamalaryn ázirleý qarastyrylǵan. Odan basqa mektepter janynan 9 ınklúzıvti resýrstyq ortalyq ashý, kózi nashar kóretin jáne damýy kem balalarǵa arnalǵan jeti jarym myń Braıl oqýlyǵyn satyp alý, ınklúzıvtik bilim berýdegi 1000 defektolog mamandy arnaıy kýrstarda oqytý qarastyrylǵan. Oǵan 433 mln teńge bólinedi (1,8%)», - dep naqtylady mınıstr.

Onyń sózine qaraǵanda, Ulttyq biryńǵaı testileýdiń standarttaryn qaıta qarastyrý óte mańyzdy. Jańartylǵan bilim berý mazmunyna kóshý sheńberinde VOÝD, UBT tapsyrmalaryn da ózgertý kerek. Tapsyrmalardy aqparatty este saqtaý qabiletin baǵalaýǵa emes,  balanyń fýnksıonaldyq saýattylyǵyn anyqtaýǵa, alǵan bilimin qoldana bilýin tekserýge baǵyttap qurý kajet bolyp tur. Sondyqtan mýltımedıa elementteri bar 230 myńnan astam  jańa test tapsyrmalary jasalatyn bolady. Oǵan 1,2 mlrd teńge bólinedi (qaryzdyń 5 paıyzy).

Josparlanǵan sharalar aýyl men qala mektepteriniń arasyndaǵy oqý úlgeriminiń alshaqtyǵyn qysqartýǵa kómektesedi. Sıfrlyq bilim berý resýrstaryna qoljetimdilikti arttyrady jáne sol arqyly sapaly bilimge jetkizedi.

QazAqparat

---