InfoHub Logo

QR Densaýlyq saqtaý vıse-mınıstri Alekseı Soı «Astana» medısına ýnıversıtetinen stýdentterdiń shyǵarylýyna qatysty pikir bildirdi.

«Atalǵan fakt anyqtaldy, barlyq ister prosesýaldyq isti júrgizý boıynsha ishki ister departamentine tapsyryldy. Qazirgi ýaqytta qylmystyq is qozǵalyp, mundaı jalǵan sertıfıkattar boıynsha tergeý júrgizilýde», - dedi ol QR Parlament Májilisiniń otyrysynan keıin.

Alekseı Soıdyń aıtýynsha, stýdentter JOO-ǵa ózderi jalǵan sertıfıkatty tapsyrǵan. Sonymen birge, anyqtalyp otyrǵanyndaı, sertıfıkattardy tekserý boıynsha zańnamany tolyqtyrý qajettiligi týyndap otyr.

«Qazirgi tańda «Bilim týraly» zańda atalǵan sertıfıkattardy tekserý boıynsha tikeleı quzirettilik joq. Olardyń barlyǵynda mór bolǵan, al JOO-da mundaı (tekserý) quziret joq», - dedi A.Soı.

Buǵan qosa vıse-mınıstr oqýdan shyǵarylǵan stýdentter úshin JOO-ǵa esiktiń birjolata jabylyp qalmaǵanyn - kúni erteń aqyly bólimge aýysý múmkindigi baryn aıtty.

Eske sala ketsek, «Astana» medısına ýnıversıtetinde daý týyp, magıstratýra, rezıdentýra jáne doktorantýraǵa túsý úshin IELTS sertıfıkatyn satyp alǵan 100-den astam stýdent oqýdan shyǵarylǵan bolatyn.

Kóp ýaqyt ótpeı QR Bilim jáne ǵylym mınıstri Erlan Saǵadıev Astana medısına ýnıversıtetindegi daýǵa qatysty pikir bildirgen edi.

QazAqparat

---