InfoHub Logo

Memlekettik jáne ulttyq joǵary oqý oryndaryn memleket 100 paıyz qatysatyn komersıalyq emes aksıonerlik uıymǵa ózgertý máselesi qaralyp otyr. Bul týraly Parlament Májilisiniń jalpy otyrysynda QR Bilim jáne ǵylym mınıstri Erlan Saǵadıev málim etti.

Oqý oryndaryndaǵy basqarýshylyq derbestikke toqtalǵan mınıstr, «JOO-nyń akademıalyq erkindigin arttyrý - ýnıversıtetti basqarý júıesiniń ózgerýine tyǵyz baılanysty. Onyń ózgerýi - jumysqa qabyldaý, mamandyqtar jáne daıarlaý baǵyttary boıynsha stýdentter kontıngentin qalyptastyrý, JOO-lardyń akademıalyq qurylymyn anyqtaý máselesin derbes sheshýge jaǵdaı jasaıdy. Bul úshin birqatar sharalardy atqarý qajet. Birinshiden, JOO-nyń uıymdyq-quqyqtyq formasyn ózgertý. Óıtkeni, memlekettik JOO-lar memlekettik múlik týraly zańmen retteledi. Bul olarǵa qıyndyq týdyrady. Keı jaǵdaıda olardyń negizgi mısıasy men maqsattaryna qaıshy keledi. Komersıalyq emes formadaǵy JOO-lardyń artyqshylyǵy - korporatıvti basqarý normasyn saqtaıdy jáne alǵan tabysty oqý ornyn damytýǵa jumsaýǵa múmkindik beredi. Ol úshin, zań jobasynda memlekettik jáne ulttyq JOO-lardy memleket 100% qatysatyn komersıalyq emes aksıonerlik uıymǵa ózgertý boıynsha normalar engizilgen. Sonymen qatar, komersıalyq uıymdar retinde qurylǵan jekemenshik oqý oryndaryna arnalǵan transformasıalaý tetigi jeńildedi. Biraq, ol mindetti emes», - dedi.

Osylaısha, RMK-dan komersıalyq emes uıymǵa ótý kezinde ýnıversıtetter Kásipkerlik kodeks aıasynda keıbir komersıalyq qyzmet túrlerin júrgize almaıdy. Osy máseleni sheshý úshin «Bilim týraly» Zańǵa ýnıversıtet qyzmeti men quzyretin reglamentteıtin jeke bap qosý usynyldy. Atalǵan bap zań jobasynyń qaǵıdasy jáne depýtattar usynǵan ózgerister boıynsha daıyndaldy.

«Baptyń normalary ýnıversıtetterge komersıalyq qyzmettiń 13 túrin atqarýǵa múmkindik beredi. Sonymen qatar, ýnıversıtetterdiń basty quzyretterin anyqtap, olarǵa qosymsha quqyqtar beriledi. Bul turǵyda joǵary jáne joǵary oqý ornynan keıingi bilim berý uıymynda endaýment-fond qurý; búdjetten tys qarjy esebinen ǵylymı - bilim berý qyzmetimen aınalysatyn zańdy tulǵalardy qurý; startap kompanıalar ashý; jarǵylyq qyzmetti iske asyrý úshin qosymsha materıaldyq jáne qarjy kózderin tartý; sheteldik memleketterde fılıaldaryn qurý jáne basqa da qadamdar qatylǵan», - dedi mınıstr.

Budan bólek, usynyp otyrǵan uıymdyq-quqyqtyq forma -korporatıvti basqarý prınsıpterin engizý degendi bildiredi. Kóptegen ulttyq JOO-larda baıqaý keńesteri bar. Iaǵnı basqarýdyń alqaly formasyna kezeń-kezeńmen kóshirilýde. Korporatıvti basqarý organdaryn damytý JOO-nyń basshylaryn taǵaıyndaý men bosatýdyń jańa tetigin engizýge, olardyń quzyretiniń merzimin anyqtaýǵa, qoǵam aldynda esep berý tájirıbesin engizýge múmkindik beredi. Búdjettiń ashyqtyǵyn qamtamasyz etedi.

«Mysaly, qazir jańa mehanızmder aıasynda ashyq konkýrs arqyly 16 rektor saılandy. Osylaısha, zań jobasy ýnıversıtettiń ishki qurylymyn jasaý, qyzmetkerlerdi irikteý jáne ornalastyrý krıterııleri men prosedýralaryn derbes ázirleýge baılanysty qyzmetterdi oryndaýǵa quqyq berdi», - dedi Erlan Saǵadıev.

Talqylaýdan keıin palata depýtattary «QR keıbir zańnamalyq aktilerine joǵary oqý oryndarynyń akademıalyq jáne baqylaý derbestigin keńeıtý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.

QazAqparat

---