InfoHub Logo

Jetisaı aýdanynyń Alǵabas aýylynda 38 jastaǵy Áıgerim Ájikeevany aıýandyqpen óltirgen is boıynsha sot úkimi shyqty. Kórshisi, 49 jastaǵy Tórehan Eralhan 20 jylǵa bas bostandyǵynan aıyryldy.

Qaıǵyly oqıǵa 20 qańtarda bastaldy. Áıgerim dúkenine taýar alýǵa shyǵyp, oralmaǵan. Anasy Meıramgúl Berdalıeva dereý izdeýge kirisip, buryn eki adam óltirgeni úshin sottalǵan kórshisine kúdik keltirgen. Ol sol kúni ózin aqtap shyqqanymen, ertesinde joǵalyp ketken.

Eki aptadan keıin kúdiktiniń týysy polısıaǵa habarlasyp, aýlada jerden múrdeniń qoly shyǵyp turǵanyn aıtqan. Tergeýshiler shóppen jabylǵan shuńqyrdan jalańash, azaptalǵan deneni tapty. «Túrin taný múmkin bolmady – bári isip ketken, denesi kógergen, qoldary tilingen. Qyzymdy jaı óltirmeı, qorlaǵan», – deıdi anasy.

Otbasy qylmysqa birneshe adam qatysqan dep sanaıdy. Kýágerler Áıgerimdi dúken mańynda úreıli kúıde, kúdiktimen jáne taǵy birneshe er adammen birge kórgen. Biraq dúkenniń beınebaqylaý jazbasyn týystaryna áli kórsetpegen.

Tergeý barysynda Eralhan on jyl boıy Áıgerimnen aqsha bopsalap kelgeni, tipti nesıe aldyrǵany anyqtaldy. Joǵalǵan kúni 420 myń teńgesi bolǵan, biraq denesi tabylǵanda ne aqshasy, ne kıimi bolmaǵan.

Sot sheshimi shyqqanymen, týystary 20 jyldyq jazany tym jeńil dep baǵalady.