InfoHub Logo

Taraz qalasynda avtosalonnyń satylym bólimin basqarǵan 25 jastaǵy jigit klıentter men kompanıany aldap, asa iri kólemde qarjy jymqyrǵan. Onyń bul áreketteri úshin alǵashqyda 5 jyl 1 aıǵa bas bostandyǵynan aıyrylǵanymen, kasasıalyq sot bul sheshimdi ózgertip, jaza merzimin 8 jylǵa uzartty.

Bul týraly Infohub.kz aqparat agenttigi habarlaıdy.

Klıentti aldap, avtosalonnyń kóligin bergen

Tergeý nusqasy boıynsha, jas basshy klıent áıeldiń 90 mıllıon teńgelik kóligin jańasyna aýystyryp beremin dep aldaǵan. Áıeldiń kóligin satyp, aqshasyn óziniń ıgiligine jaratqan. Keıin, qylmysty jasyrý úshin, basshylyqtyń ruqsatynsyz, avtosalonnyń 83 mıllıon teńgelik jańa kóligin áıelge berip jibergen.

Taǵy da alaıaqtyq áreketter

Bul oqıǵalarmen toqtap qalmaǵan. Ol salonǵa satylýǵa qaldyrylǵan eki kólikti 68 mıllıon jáne 34 mıllıon teńgege satyp, aqshasyn ózine qaratqan. Sonymen qatar, kompanıaǵa tıesili quny 59 mıllıon teńge bolatyn jańa Toyota Land Cruiser kóligin de tómen baǵamen satyp jibergen.

Sot sheshimi

Bastapqyda sot ony alaıaqtyq jáne rastrata jasady dep tanyp, jaza retinde 5 jyl 1 aı merzimge bas bostandyǵynan aıyrǵan. Mundaǵy jeńildetetin jaǵdaılar retinde jas kezi men kinásin ishinara moıyndaǵany eseptelgen.

Alaıda, prokýratýra bul sheshimmen kelispeı, isti kasasıalyq sotqa bergen. Sot materıaldaryn zerdelegennen keıin, keltirilgen 334 mıllıon teńge zalal áli kúnge deıin ótelmegenin eskerip, úkimdi ózgertedi. Nátıjesinde, bas bostandyǵynan aıyrý merzimi 8 jylǵa deıin uzartyldy.

Avtokólik satyp alý kezinde alaıaqtardan qalaı saqtanýǵa bolady?

Redaksıa eske salady: resmı dılerlermen mámile jasasqanda, kelisimsharttar men mórlerdi muqıat tekserip, aqshalaı qarajattyń qyzmetkerlerdiń qolyna emes, kompanıanyń resmı shotyna aýdarylǵanyna kóz jetkizý mańyzdy.