Qylmystan jazyp Táńirige,
Qarsy kelip ámirine,
Qýyldy Adam jumaqtan.
«Qaıt,- degen,- qara jerińe,
Besigińe, kórińe!»-
Buıryq boldy bir haqtan.
Batpas jaryq kúni joq,
Perishteler úni joq,
Aınala - ólim typ-tynysh.
Ótkelsiz bıik taýy bar,
Esepsiz túrli jaýy bar,
Qarańǵy kórdeı qorqynysh.
Jerge tústi jalańash,
Kóńilde - qasiret, kózde - jas,
«Kesh, Táńiri!»- dep surady.
Qoryqty ma qatty jazadan,
Alda qur jalǵyz azadan,
Zarlady, qatty jylady.
Jerde jalǵyz zaryǵyp,
Kóktegi jumaq saǵynyp,
Jylady baspaı óksigin.
Jasty kórip, Jaratqan,
Ystyq darıa bop aqqan,
Ashty raqmet esigin.
Jumaqtyń jibek jelinen,
Jaınaǵan máńgi gúlinen,
Hosh ıisin ańqytyp,
Kúmis káýsar sýynan,
Sýynyń altyn býynan,
Betinde nuryn balqytyp,
Kóktiń batpas Kúninen,
Perishteler úninen,
Jumaqta horlar lebizinen,
Óz nurynan nur bólip,
Sezgish, súıgish jan berip,
Mahabbat, rahmet teńizinen,-
Jaratty Táńiri áıeldi:
Bastasyn dep bar erdi
Týralyq, shyndyq jolyna.
«Adaspassyń, azbassyń,
Týra joldan jazbassyń,
Erseń,- dep,- munyń sońyna!»
«Jumaqtan jyraq kettim!-dep,-
Keshilmes kúná ettim!»- dep,
Jylama zarlap, nalyma!
Jolbasshyńnan órnek ap,
Seniń de kóńiliń bolsa aq,
Jumaq daıar taǵy da!»
Ótti zaman. Jas kepti.
Qorqynysh, qater, qaıǵy ótti,
Umytty adam Allasyn.
Jaýyzdyń jasy jalǵan ba ed?
Jaýyzdyq oǵan arman ba ed?
Jer jutty ma ýaǵdasyn?
Keshegi áıel-perishte
Adamdy bastar ǵaryshqa,
Júzi jarqyn nurly aıdan,-
Eńiretip kúń ǵyp satatyn,
Erikkende oınap jatatyn
Boldy, qaldy bir haıýan.
Endi ejelgi kórki joq,
Kórgeni qorlyq, erki joq,
Estısiń be zarly únin?
Bul isińdi qoımasań,
Áıelmen ylǵı oınasań,
Júrmesin kóp bop bul kúniń!

---