InfoHub Logo

Bir qoıan óte aılaker eken. Baıqaýsyzda ózin ustap alǵan qasqyrǵa da, túlkige de aılamen qutylyp ketip júredi.

Bir kúni qalyń butaly saıdy aralap kele jatady da apanynyń aýzynda alqynyp, sharshap otyrǵan aıýdy kóredi. Qalqıyp qarsy aldyna tura qalady da ony mazaqtap, ándete bastaıdy

 

               – Áı, Qorbańbaı, Qorbańbaı,

               Kúniń qarań bolǵan ba-aı?

               Kezip qalyń aǵashty,

               Júrýshi ediń ordańdaı.

               Áliń bitip qalypty,

               Endi ólesiń, sormańdaı!..

 

Onyń bul qylyǵyna yza bolǵan aıý tap bergen kezde, qoıan zyta jóneledi. Túbir-túbirtikterden orǵyp, ustatpaı ketedi. Sol betimen buta-butany aralap, ár jerden júrgen qoıandardy jınap alady.

– Júrińder, men senderge bir qyzyq kórseteıin, – deıdi. Onyń lepirgenine qoıandar tańdanysady. Sonda da áýestenip:

– Ol qandaı qyzyq? – dep surasady.

– Erińder sońymnan, barǵan soń bilesińder.

– Júr, endeshe, – dep, basqa qoıandar sońynan ilesedi.

Sytyrlaǵan sybyrdy estigen aıý qalyń butanyń arasyna tyǵyla qalady. Álgi qoıan aıýdy apanynda jatqan shyǵar dep oılap, taqap barady da:

– Áı, Qorbańbaı, tyńda, – deıdi de ándete óleń aıtý úshin tamaǵyn keneıdi. Sol kezde tasada turǵan aıý shap berip, qoıannyń edireıgen qulaǵynan ustaı alady.

– Á, bálem, tústiń be qolǵa? – dep kijinedi. Mundaı oqıǵany kútpegen qoıannyń záresi ushady.

Basqa qoıandardyń kúlip turǵanyn baıqaǵan soń baryp, tez esin jınaıdy da:

– Aıý aǵa, jańaǵy aǵattyǵym úshin men ózińnen keshirim suraǵaly kelip em, – deıdi, jalbaryna aılaǵa basyp. – Myna qoıandardy kýá bolsyn dep, ádeıi ertip kelip em.

Muny estigen soń:

– A, solaı ma?.. – dep, ańqaý aıý qoıandy bosatyp qoıa beredi. Sóıtip, aılaker qoıan taǵy da amalyn asyrǵan eken.

---