InfoHub Logo

Tanymal teatr jáne kıno akteri Azamat Satybaldy ómirindegi eń aýyr synaqtardyń biri týraly ashyq aıtty. Ol jarynyń densaýlyǵyna baılanysty bala kótere almaıtyny týraly dıagnoz qoıylǵandaǵy qıyndyqtardy bólisti.

Bul týraly Infohub.kz aqparat agenttigi habarlaıdy.

Otbasylyq qıyndyqtar

Akterdiń aıtýynsha, olar otbasynda bir ǵana ul tárbıelep otyr. Alaıda, keıbir adamdardyń «Týyp almaısyńdar ma? Ne istep júrsińder bir balanyń betine qarap?» degen sózderi janǵa batatyn bolǵan. Azamat Satybaldy bul sózderdiń artyndaǵy jaǵdaıdy eshkim bilmeıtinin aıtty.

Ol jubaıy Nazgúl ekeýiniń de kópbalaly otbasynan shyqqanyn, ózderi de kóp balaly bolýdy armandaǵanyn jetkizdi. Alaıda, tuńǵysh uldary dúnıege kelgennen keıin jary syrqattanyp, dárigerler oǵan bala kótere almaıtynyn aıtqan.

Dárigerlerdiń dıagnozy jáne ákeniń danalyǵy

«Bizdiń barmaǵan jerimiz joq. Biraq nátıje bolmady. Birden “bala kótermeıdi” degen dıagnoz qoıyldy. Jigit bolǵan soń jaman oılar da keledi eken», – deıdi akter.

Akterdiń aıtýynsha, sol kezde ákesiniń bir aýyz sózi ony úlken qatelik jasaýdan saqtap qalǵan. Ákesi: «Eger Nazgúlden basqa áıel alamyn deseń, bolmasa ajyrasyp toqal alamyn deseń, eki dúnıede batamdy bermeımin. Maǵan Nazgúlden artyq kelin kerek emes. Alla Taǵala 1 balaǵa tatymaıtyn 10 bala bere me, 10 balaǵa tatıtyn 1 bala bere me – ózi biledi. Bar balańa shúkir et» dep aıtqan eken.

Ómirlik sabaq

Ákesiniń sózderinen keıin Azamat Satybaldynyń kózqarasy ózgerip, otbasyndaǵy qarym-qatynas nyǵaıa túsken. «Qazir ulym 21 jasta. Eshqashan ókinbeımin. Ákemniń danalyǵyna rızamyn», – dedi akter.