InfoHub Logo

Birikken Arab Ámirlikteriniń prezıdenti sheıh Muhammed ben Zaıd Ál Nahaııan men Dýbaı murager hanzadasy Taıaý Shyǵystaǵy shıelenis asqynyp turǵan shaqta, eldegi eń tanymal oryndardyń biri – Dubai Mall saýda ortalyǵyna baryp, jurtshylyqty beı-jaı qaldyrmady. Bul týraly Anadolu agenttigi habarlaıdy.

Memleket basshylarynyń kópshilikke kórinýi, ásirese, saýda ortalyǵynda keshki as ishýi – aımaqtaǵy turǵyndar men týrıser arasyndaǵy alańdaýshylyqqa jaýap retinde qabyldandy. Irannyń Parsy shyǵanaǵy elderine jasaǵan soqqylary jalǵasyp jatqanda, Ámirlikter basshylary saýda ortalyǵynda serýendep, jergilikti kafelerdiń birinde tamaqtanyp, eldegi tynyshtyqty kórsetýge tyrysty.

Saýda ortalyǵyna kelgender prezıdenttiń sýretteri men vıdeolaryn áleýmettik jelilerde belsendi bólisip, eldegi qalypty ómir saltyn qoldaǵany úshin rızashylyqtaryn bildirdi. BAÁ basshysynyń bul áreketi álemge Ámirlikterdiń beıtaraptylyǵy men turaqtylyǵyn kórsetetin «qýatty habarlama» retinde baǵalandy.

Aımaqtaǵy jaǵdaı

Taıaý Shyǵystaǵy jaǵdaı 28 aqpanda AQSH pen Izraıldiń Iranǵa qarsy áskerı operasıasy bastalǵannan keıin kúrt shıelenisti. Tegeran Parsy shyǵanaǵy elderindegi amerıkandyq bazalar men nysandarǵa jappaı soqqylarmen jaýap berdi.

Halyqaralyq reaksıa

Soqqylar kezinde Ulybrıtanıa premer-mınıstri Kır Starmer aımaqty ırandyq drondardan qorǵaýǵa ýáde berdi. Kómek retinde Ýkraınadan áskerılerdi tartýdy usyndy.

Ýkraına prezıdenti Vladımır Zelenskıı óz kezeginde, Taıaý Shyǵysqa «Shahed» drondaryn ustap alý boıynsha úzdik mamandardy jiberýge daıyn ekenin málimdedi. Alaıda, ol bir shart qoıdy: arab elderiniń basshylary Vladımır Pýtındi reseı-ýkraın soǵysynda bir aılyq bitimge kelýge kóndirýi kerek.

Parsy shyǵanaǵy elderiniń yntymaqtastyq keńesi tarapynan jaýap shabýyldar qaýpine qaramastan, Irannan jasalǵan shabýyldar áli toqtaǵan joq.