InfoHub Logo

Almaty qalasy Naýryzbaı aýdandyq polısıa basqarmasynyń ýchaskelik polısıa ınspektory Qanatbek Parmanov taǵdyr tálkegine ushyraǵan jalǵyz anaǵa úlken kómek qolyn sozdy. Reıd kezinde kezdesken Roza Dáýrenova esimdi áıeldiń múgedek ulyna baspana satyp alýǵa polısıa qyzmetkeri 9 kúnniń ishinde 12 mıllıon teńge jınap berdi.

Bul týraly Infohub.kz aqparat agenttigi habarlaıdy.

Taǵdyrdyń taýqymetin tartqan ana

Maqtaral aýdanynda týǵan Roza Dáýrenovanyń ómir joly qıyndyqtarǵa toly boldy. Anasy qaterli isikke shaldyǵyp, ákesiniń kózi nasharlap kórmeı qalǵan. Ata-anasyna aýyrtpalyq salmaǵan Roza Almatyǵa kelip, meıirbıke mamandyǵyn oqýǵa túsedi.

Turmys qurǵannan keıin uzaq jyl bala súıe almaı qınalǵan Roza tórt ret júkti bolyp, úsh balasynan aıyrylady. Jasandy uryqtandyrý arqyly 20 jyldan soń uldy bolǵanymen, balasy shala týyp, 3,5 jyl boıy aýrýhanadan shyqpaıdy.

Kúıeýi tastap ketken ana

Aýyr jaǵdaıǵa dýshar bolǵan Rozanyń kúıeýi ony tastap, basqa áıelge ketip qalady. Balasynyń shala týyp, keıin sal bolyp qalýyna dárigerlerdiń qateligi sebep boldy dep esepteıtin ana, týystarymen de aralaspaıdy. Olar Rozany densaýlyǵy nashar balany arnaıy mekemege ótkizýge úgittegen.

Polıseıdiń janashyrlyǵy

Roza Almatyda 80 myń teńgege páter jaldap turady. Ulyna alatyn 74 myń teńge járdemaqysy páteraqysyna da jetpeıdi. Qymbat dári-dármekterdi satyp alýǵa aqshasy bolmaı, qatty qınalǵan kúni ýchaskelik polısıa ınspektory Qanatbek Parmanovpen kezdesedi. Ananyń jaǵdaıyn estigen polıseı, oǵan kómektesýge bel býady.

9 kúnde jınalǵan 12 mıllıon teńge

Qanatbek Parmanov Rozanyń jaǵdaıyn vıdeoǵa túsirip, áriptesterine jiberedi. Onyń bastamasymen 9 kúnniń ishinde halyqtan 12 mıllıon teńge qarajat jınalady. Sol aqshaǵa Shymkentten bir bólmeli páter satyp alynyp, ana men balaǵa tabys etildi.

«Bir qıyndyqtyń artynda bir qýanysh bar dep beker aıtpaǵan ǵoı. Sol polısıa qyzmetkeri Qanat Parmanovtyń, sosyn halyqtyń arqasynda baspanaly boldym. Qýanyshymda shek joq», - deıdi Roza Dáýrenova.

Polıseıdiń ózi

Qanatbek Parmanov – úsh balanyń ákesi, Naýryzbaı aýdandyq polısıa basqarmasynyń qoǵamdyq qaýipsizdik bóliminiń ýchaskelik polısıa ınspektory. 20 jylǵa jýyq eńbek ótili bar tájirıbeli qyzmetker. Áriptesteri ony qarapaıym, aqyldy, sabyrly ári janashyr jan retinde sıpattaıdy.