Altyn kún batyp barady,
Kúıdirip kóktiń jıegin.
Quralaı kózdi qaraǵym,
Boldyń ba ıirip jibegiń?
Kuralaı kózdi qaraǵym,
Qolyńa qardaı bátesti al.
Qandaı qyzyl jibekpen
Aq báteske órnek sal.
Altyn Kún batyp barady,
Altyn Kún aqyryn óledi.
Sur bulttar - sorly jar, ý
Qan jylap kúndi kómedi.
Kún óldi. Kók kúńirendi.
Jer jamyldy qarasyn.
Quralaı kózdi qaraǵym,
Kesteńdi qashan bolasyń?
Sondaı sulý sáýletaı,
Bir qarashy. Ańsadym.
Sýda oınaǵan shabaqtaı
Súıreńdeıdi saýsaǵyń.
Qabaqqa qatar tizilgen
Kirpik pe? Qara jibek pe?
Bir qarashy, qaraǵym,
Ý toldy ǵoı júrekke!
Qalaı batyl oınaıdy
Súırik saýsaq bizbenen!
Neń ketedi, erketaı,
Óltirseń atyp kózbenen?
Qarama maǵan, qaraǵym,
Bolsyn kóziń kórgishte.
Qandaı qyzyl jibekpen
Aq bátesti kestele!
Jer jarynan aırylyp,
Jamyldy qara basyna.
Bota kózdi burań bel,
Jibershi jaqyn qasyńa!
Qarańǵylyq qaptady,
Qaıǵy ma basqan, tún be eken?
Sybdyr-sybdyr álde ne?
Jel me? Júrgen jyn ba eken?
Qabaǵyń shytpa, qaraǵym,
Janyńa jaqyn keleıin.
Qar betine qanmenen
He dep jazdyń,- kóreıin!
Tym jaqyndap barmaıyn,
Jyraqtan jarar kóz salsam.
He dep jazdyń, qaraǵym?-
«El úshin ól, er bolsań!»
Quralaı kózdi qaraǵym,
Jarylady-aý jas júrek!
Kózime qan toltyrdy
Qar ústinde qan jibek.
«El úshin ól. El úshin...»-
Ómirdi aıap ne eteıin!
Súırikten sulý saýsaǵyń,
Men sadaǵa keteıin!
Túnergen tún óledi,
Aǵarǵan anaý tańy ma?
Aq bátestiń betinde
Júregińniń qany ma?
«El úshin ól. El úshin...»-
Ólesiń, júrek, dúrsilde!
Quralaı kózdi karaǵym,
Kesteńe qarap kúrsinbe!
Quralaı kózdi qaraǵym,
Attanaıyn tańmenen.
Aq bátes - aq jalaýym
Kestelengen qanmenen.
Qosh bol endi, qaraǵym,
Meni esińe alǵaısyń!
Endi bátes betine:
«Imandy bol!»- dep jazǵaısyń.
Altyn kún shyǵyp keledi,
Altyndap kóktiń jıegin.
Kuralaı kózdi qaraǵym,
Iire ber jibegiń!

---