InfoHub Logo

I.Kirispe
Qazaq halqynyń irgeli atrıbýttary bir óziniń bolmysynan tolyq tabylatyn Baýyrjan Momyshuly medısına ınstıtýtynyń stýdenti, oqytýshy, ekonomıs, mılısıa bóliminiń bastyǵy, Qazaq SSR Soǵys komısarıatynyń qyzmetkeri, armıa generaly, soǵys óneriniń teoretıgi sıaqty qyzmetterde bolyp, óz eline, Otanyna adaldyǵyn kórsetti. Surapyl soǵystyń alǵy shebinde onyń ystyq, sýyǵyn basynan keshirdi. Jaýyngerlerdiń qaınaǵan ortasynda júrip, olarmen birge Otan qorǵaý degen qasıetti boryshty oryndaýda ultjandylyqtyń, ulttyq maqtanyshtyń shyn máninde ne ekendigin is júzinde kórsetti, dáleldedi. Soǵys óneriniń maıtalman sheberi dárejesine kóterilip, onyń strategıasy men taktıkasynyń teorıasyn jasady.Soǵystan keıin beıbit ómirde jazýshylyqpen aınalysyp, keıingi jas urpaqty týǵan jerge, týǵan elge shynaıy berilgendik rýhynda tárbıeleýge atsalysatyn tamasha shyǵarmalardy dúnıege ákeldi.

Baýyrjan Momyshulynyń «el» uǵymynda tolymdy, jınaqy, tutas beınesi qalyptasqan. Ol-soǵysta da, beıbit ómirde de adaldyqty, ádildikti, týralyq pen shynshyldyqty tý etip kóterdi. Qýlyq, sumdyq, ekijúzdilik, jaǵympazdyq, jalqaýlyq, qorqaqtyq, ataqqumarlyq, dúnıeqońyzdyq sekildi pendeshilikterge jan-tánimen qarsy turdy. Óıtkeni, qumarlyqqa aınalǵan jat ádet, aram pıǵyldardyń bári de túptiń tereńinde ádilettilikke, adaldyqqa qarsy ashyq shabýylǵa kóshetini, sóıtip, aıdaı álemge óz ústemdigin ornatqysy keletini anyq emes pe? Al mundaı ádet-pıǵyldarǵa arystandaı aqyryp qarsy shyǵý batyr bolmysqa tán qasıet.

Baýyrjan Momyshuly qazaq baýyrlarynan jyraq aımaqtarda kóp qyzmet etip, basqa ulttardyń ókilderimen kóp aralasyp, olardyń ulttyq ereksheligimen etene tanysa otyryp, qazaq halqynyń ulylyǵyna, darhandyǵyna, tákapparlyǵyna, sonymen qatar, meıirimdiligine kóz jetkizdi. Udaıy ózin - ózi basqalarmen salystyryp, ekshep, tarazylap otyrǵandyqtan, basqalar kúndelikti ómirde kóp mán bermeıtin kóptegen ulttyq qundylyqtardyń qadir-qasıetin ishki jan- dúnıesimen sezindi.