InfoHub Logo

Premer-mınıstr Oljas Bektenov Aqmola oblysyna jumys sapary barysynda sý tasqynyna qarsy daıyndyq máselelerin talqylady. Memlekettik organdar basshylary men birqatar oblys ákimderiniń qatysýymen ótken jedel shtab otyrysynda Prezıdent tapsyrmalary aıasynda tirshilikti qamtamasyz etý nysandarynyń jumysy, aldyn alý jáne jedel áreket etý sharalary qaraldy.

Bul týraly Infohub.kz aqparat agenttigi habarlaıdy.

Ózen arnalary keńeıtilip, jaǵalaýlar nyǵaıtyldy

Oljas Bektenov Kókshetaýdaǵy Qylshaqty ózenin tereńdetip, arnasyn keńeıtý jumystarymen tanysty. 2024 jylǵy tasqynnan keıin «QazSınk» kompanıasynyń qoldaýymen jaǵalaýdy bekitip, kanaldyń ótkizý qabileti sekýndyna 136 tekshe metrge deıin arttyrylǵan. Shaǵalaly ózeninde de osyndaı jumystar júrgizilip, 2025 jylǵy kóktemgi kezeńde bul sharalardyń tıimdiligi baıqaldy.

Aqmola oblysynda bıyl sý tasqynyna qarsy sharalar 163 eldi meken men 32 jol ýchaskesin qamtydy. Uzyndyǵy 56 shaqyrym bolatyn bes ózen arnasy tazartylyp, tereńdetildi, 17 gıdrotehnıkalyq qurylys qalpyna keltirilip, kúsheıtildi.

Qaýipti faktorlar men ákimderge qoıylǵan talap

Premer-mınıstr jaǵdaıdy ýshyqtyrýy múmkin faktorlarǵa toqtaldy: qalyń qar, kúzgi jaýynnan keıingi jerdiń qatyp qalýy, topyraq qabatyndaǵy tereń toń. Keıbir óńirlerde daıyndyq tolyq aıaqtalmaǵany, ózen arnalaryn tereńdetý men jaǵalaýdy bekitý jumystarynyń sozylyp ketkeni, eldi mekenderden qar shyǵarýdyń jetkiliksizdigi synǵa alyndy.

Oljas Bektenov ákimderge «kez kelgen senarıge daıyn bolýdy» tapsyryp, bir apta ishinde táýekeli joǵary eldi mekenderdi aralap, naqty shara qabyldaýdy mindettedi.

Mınıstrlerdiń baıandamalary men boljamdar

2026 jylǵy sý tasqyny kezeńine daıyndyq jóninde Ekologıa, Sý resýrstary jáne TJ mınıstrleri baıandama jasady. Aqmola, Qaraǵandy, Soltústik Qazaqstan oblystarynda sý basý qaýpi saqtalyp otyrǵany aıtyldy.

Qazgıdromettiń boljamy boıynsha, naýryz jáne sáýir aılarynda ortasha temperatýra normadan joǵary, al jaýyn-shashyn kóp bolady dep kútiledi. Sý basý qaýpi Aqmola, Qaraǵandy, Soltústik Qazaqstannan bólek, Shyǵys Qazaqstan, Abaı, Qostanaı, Batys Qazaqstan, Aqtóbe, Pavlodar, Túrkistan, Almaty, Ulytaý jáne Jetisý oblystarynda da bar. Táýekeli tómen óńirler de ataldy.

TJM-niń daıyndyǵy men qaýipsizdik sharalary

Tótenshe jaǵdaılar mınıstrliginiń jedel shtaby 1 naýryzdan bastap táýlik boıy monıtorıń júrgizip otyr. El boıynsha sý basý qaýpi bar 1242 eldi meken anyqtalǵan. 39 myńnan astam adam, 18 myńnan astam tehnıka men arnaıy qural daıyn tur. Ótken jyly 842 birlik arnaıy tehnıka, 27 qaıyq, 4 ushaq jáne basqa da jabdyqtar alynǵan. Sondaı-aq 830 shaqyrymnan astam qorǵanys bógetteri salyndy, 1128 shaqyrym drenaj júıeleri men kanaldar jóndeldi.

Premer-mınıstr Shýchınsk pen Semeıdegi oqıǵalardy eskerip, aldyn alý sharalaryn kúsheıtýdi tapsyrdy. TJ mınıstri Semeıdegi órttiń tez toqtatylǵanyn, al Shýchınskidegi jarylystyń sebebi turmystyq gaz balondaryn paıdalaný erejesiniń buzylýymen baılanysty ekenin habarlady. Órt qaýipsizdigin kúsheıtý, reıdter men túsindirý jumystaryn jandandyrý tapsyryldy.

Jańa tehnologıalar men ınfraqurylym

«Biryńǵaı drondar ınfraqurylymy» jobasy tanystyryldy. Drondar sý deńgeıin, qorǵanys nysandarynyń jaı-kúıin baqylap, aqparatty jedel shtabtarǵa jetkizýge múmkindik beredi. Bul júıe Aqmola oblysynyń aýdan ortalyqtary men qalalarynda engizilgen. Drondar arqyly TKSH qaýipsizdigi, sanıtarlyq ahýal, aýyl sharýashylyǵy alqaptary baqylanyp, órt, zańsyz qoqys polıgondary sıaqty táýekelderdi erterek anyqtaýǵa sep bolady.