InfoHub Logo

Serbıa astanasy Belgradta myńdaǵan adam el prezıdenti Aleksandr Výchıchtiń otstavkasyn talap etip, alańǵa shyqty. Narazylyq aksıasy qalanyń ortalyǵyndaǵy Slavıa alańynda ótti. Halyq merziminen buryn saılaý ótkizýdi jáne 10 jyldan astam ýaqytqa sozylǵan Výchıch bıliginiń toqtatylýyn talap etti.

Bul týraly Infohub.kz aqparat agenttigi habarlaıdy.

Aksıa kezinde polısıa narazylardy taratý úshin kózden jas aǵyzatyn gaz ben jaryq-dybys granatalaryn qoldandy. Halyq arasynan da qarsylyq bolyp, qoqys jáshikterin órtegen sátter boldy. Polısıa men narazylar arasynda qaqtyǵys oryn aldy.

Prezıdent merziminen buryn saılaý ótkizýge kelisti

Osy jaǵdaılarǵa baılanysty prezıdent Aleksandr Výchıch osy kúzde merziminen buryn parlamenttik saılaý ótkizý týraly sheshim qabyldaǵanyn málimdedi. Bul Serbıadaǵy sońǵy on jyldaǵy besinshi saılaý bolady jáne tórtinshi ret merziminen buryn ótedi.

Narazylyqtardyń sebebi

Serbıadaǵy narazylyqtar shamamen bir jarym jyl buryn Novı-Sad qalasyndaǵy temirjol vokzalynda shatyrdyń qulaýy saldarynan 16 adam qaza tapqan tragedıadan keıin bastalǵan. Aksıalardy jastar qozǵalysy uıymdastyryp otyr. Olar sybaılas jemqorlyq pen tıimsiz basqarýǵa qarsylyq bildirýde.

Polısıanyń baǵalaýy boıynsha, alańda jáne oǵan japsarlas kóshelerde 34 300 adam jınaldy. Al, halyqtyq jıyndardy baqylaıtyn «Arhıv» uıymy bul sandy shamamen 100 000 adam dep baǵalady.