Belińiz nege aýyrady?

Monıtor aldynda kóp ýaqytyńyz ótedi

Adam táýliktegi ýaqyttyń, orta eseppen, 9 saǵatyn kompúter aldynda búkireıip, eńkeıip ótkizedi eken. Zamanaýı gadjetter kóbeıip, adamdarmen habar almasý tym jeńildegen saıyn arqadaǵy, ıyq pen moıyndaǵy aýrýlar da qaptap barady. Jumys arasynda úzilis jasap, moıyn bulshyqetterine jattyǵý jasap turý óte mańyzdy. Eń qarapaıym jattyǵý — basty kúnine 5 retten artqa-alǵa, eki janǵa buryp otyrý.

Sonymen qatar, uzaq ýaqyt otyrý adamnyń omyrtqasyna turǵandaǵydan da, júrgendegiden de kóp zıan keltiredi. Jumys ornyńyzda monıtor kózdiń deńgeıinde ornalasýyn, shyntaq pen tize 90 gradýsta búgilip turǵanyn, tabannyń edende nyq jatýyn qadaǵalańyz.

Etbetińizben uıyqtaısyz

Etbetinen uıyqtaý býyn men bulshyqetke kúsh túsirse, shalqaıyp ne bir janymen jatyp uıyqtaý omyrtqaǵa kúsh túsirmeıdi. Eger basqasha qalypta kóz ile almaıtyn bolsańyz, omyrtqa men bulshyqetke túsetin qysymdy azaıtý úshin jambas tusyńyzǵa jastyq qoıyp uıyqtańyz. Tipti, tósegińizdiń qatty ne tym jumsaq bolýynan da belińiz aýyrady.

Temeki shegesiz

Temeki — júrek pen ókpeniń ǵana jaýy emes. Basqalarǵa qaraǵanda shylymǵa qumartqandardyń omyrtqasy tez zaqymdanady. Nıkotın omyrtqaǵa qannyń barýyn baıaýlatyp, onyń jaraqat alyp qalý qaýpin ósiredi. Sondaı-aq, temeki adam aǵzasyndaǵy kálsıdi ózine sińirip alady da, súıekterdiń jaǵdaıy nasharlaı bastaıdy.

Kóńil-kúıińiz qubylmaly

Adam aýyrsa, onyń psıhologıalyq deninde de ózgerister baıqalady. Ǵalymdardyń aıtýynsha, arqasy, beli aýyratyn adamdar jabyrqaý júredi eken. Tereń depressıaǵa túsken adamnyń beli, tipti moıyny da aýyratyn kórinedi. Adamda stress bolsa, arqanyń bulshyqetteri jıyrylyp, tartylyp qalady. Bel aýrýynan qutylý úshin, aldymen, depressıadan qutylý kerek. Ioga, fıtnes, bı sabaqtaryna baryp, ekeýinen de arylýyńyzǵa bolady.

Siz — sánniń qulysyz

Bıik óksheli aıaqkıimderdiń densaýlyqqa zıan ekeni daýsyz, tym jaıpaq tabandy aıaq kıimder de densaýlyqqa jaqsylyq ákelmeıdi. Súıretpeler men sandaldar tabandy yńǵaısyz ustap turady da, sońynda taban, tize, bel aýyratyn bolady. Munyń bir sheshimin tabýǵa bolady: birde krosovkalar, birde sandaldar, birde bıik óksheli aıaq kıimder kıińiz. Aıaq kıimińiz óte jaıly bolý kerek jáne bir ǵana aıaq kıimdi kúni boıy kıip júrmeý kereksiz. Aıtpaqshy, beldiń aýyrýyna ıyqqa asyp alatyn sómkeler de sebepker. Ony únemi bir ıyqqa salyp júretin bolsańyz, tipti qaýipti. Sondyqtan baýy jalpaq sómkeni tańdańyz jáne ony eki ıyǵyńyzǵa alma-kezek asynyńyz. Sómkeńizdiń salmaǵy óz salmaǵyńyzdyń 10 paıyzynan kóp bolmaý kerek.

Asyra álpeshtep jiberesiz

Bel aýyrsa, adamnyń bári jatyp qalýǵa qumar. Adam jatqanda omyrtqanyń bel tusyna túsetin kúsh azaıady. Biraq, eki kúnnen artyq jatqan adamnyń belindegi aýrýy odan saıyn kúsheıe túsedi. Jaıaý kóp júrip, júzýmen aınalyssańyz, beldegi aýrý jeńildep, qan aınalymy jaqsarady, tez jazylýǵa sep bolady. Iogaǵa baryp, býyndar men bulshyqetterdi sozyp, jattyqtyrsa, beldegi aýrýdyń ketýi jyldam.