InfoHub Logo

QR Bilim jáne ǵylym vıse-mınıstri Bıbigúl Asylova jastardyń bilim izdep, shetelge ketpeýi úshin atqarylyp jatqan jumystardy baıandady.

«2017-2018 oqý jylynda 139 316 túlek mektep bitirgen. Onyń 69 paıyzy nemese 96 myńǵa jýyǵy UBT-ǵa qatyssa, qalǵan 31 paıyzy nemese 43 myń bala testileýge qatyspady. UBT tapsyrǵandardyń 87 paıyzy, ıaǵnı 84 217 túlek Qazaqstan JOO-laryna qabyldandy. Respýblıka kolejderine 26 990 bala tústi», - dedi vıse-mınıstr «Nur Otan» partıasy ortalyq apparatynda ótken jastardy qoldaý týraly komısıa otyrysynda.

Ákimdikter tarapynan qosymsha 1919 grant bólingen. Bul da túlekterdiń ózge elge attanbaı, elde qalýyna septigin tıgizbek.

«Iaǵnı, óńirdegi ákimdikter qosymsha grant bólý arqyly túlekterdiń shetelge ketýiniń aldyn alýda. Prezıdent tapsyrmasymen memlekettik bilim berý tapsyrysyn 20 myńǵa kóbeıttik. Áıtse de, shetelge ketken stýdentterdiń tizimi bar. Atap aıtqanda, Reseı Federasıasynyń JOO-laryna 8 myń qazaqstandyq qabyldanǵan, onyń 5 197-si Reseıdiń bilim grantymen oqyp jatyr, qalǵan 2 808-i aqyly negizde. 598 qazaqstandyq abıtýrıent Reseı kolejderine túsken. Odan bólek, 3 myńǵa jýyq qazaqstandyq alys-jaqyn shetelderge oqýǵa ketken», - dedi B. Asylova.

Onyń aıtýynsha, jastardy elde qaldyrý úshin memlekettik bilim grantyn kóbeıtý men stýdentterdiń jaıly ómir súrýine jaǵdaı jasaýdan bólek, bilim sapasyn jaqsartýǵa da nazar aýdarǵan jón.

«Mınıstrlik te, ýnıversıtetter de bul baǵytta jumys istep jatyr. Birinshiden, «Atameken» kásipkerler palatasy mamandyqtar boıynsha JOO-lar reıtıńin jasady. Jyl sońyna deıin taǵy qosymsha mamandyqtar boıynsha tizim jarıalanady. Bolashaq abıtýrıentter men stýdentter osy reıtıńti qarap, eń úzdik qazaqstandyq JOO-lardy tańdaı alady», - dedi Bıbigúl Asylova.

QazAqparat

---