InfoHub Logo

Ál-Farabı atyndaǵy Qazaq ulttyq ýnıversıtetinde 8-sáýir kúni Tarıh fakúltetiniń uıymdastyrýymen uly ǵalym, aǵartýshy, etnograf Ybyraı Altynsarınniń 180 jyldyq mereıtoıyna arnalǵan, «Bilim berý isiniń kóshbasshysy, uly aǵartýshy» atty onlaın formatta dóńgelek ústel ótti. İssharaǵa Tarıh, tarıh jáne geografıa mamandyǵynyń magıstranttary men «Nıka» stýdenttik ǵylymı klýbynyń músheleri qatysty.

Dóngelek ústelde eń aldymen Ybyraı Altynsarınniń aǵartýshylyq jolyn, onyn jádıdshildikke qosqan úlesi men ulttyq modernızasıany kóterý jolyndaǵy atqarǵan eńbegi týraly arnaıy daıyndalǵan magıstranttardyń baıandamalary oqyldy. Aǵartýshyny qazaq qoǵamy men tarıhynda pedagogıka salasynyń negizin qalaýshy retinde tanımyz. Ol eń alǵash qazaq balalaryna arnap mektep ashyp , odan ári ýchılısheler men  kitaphanalar ashýǵa deıin eńbek etken uly tulǵa. Óz mektepterinde birinshi orynǵa metodıkany qoısa, ekinshide balalarǵa jastaıynan beriletin durys tálim-tárbıe boldy. Bilim berý salasynda jańa metodıkalar men jańa baǵyttardy qalyptastyrdy.

Dóńgelek ústel barysynda magıstranttar joǵaryda aıtylǵan máseleler boıynsha óz pikilerin aıtyp , dıskýssıa qurdy. Qazirgi tańda, Y. Altynsarınniń tek qana pedagogıka salasynda ǵana emes, din salasynda da aıtarlyqtaı oryn alatynyn biri bilse, biri bile bermeıdi. Sonaý patsha úkimeti kezeńinde atteıst ǵalymdardyń aıtýy boıynsha hrıstıan mısıoneri dep jala jabylyp , qara halyq kóńiline kúmán uıalatqan bolatyn. Alaıda Ybyraı atamyzdyń ıslam dinin ustanýshy naǵyz musylman ekenine aıǵaqtar jeterlik. Olardyń qatarynda N.Ilmınskııge joldanǵan hattar men aǵartýshynyń eńbekterin zerttegen táýelsizdikten bergi keıingi ǵalymdar keltirgen zertteýler dálel. Qazaq qyzdaryna arnap ashqan Yrǵyzdaǵy mektebi de sol zamannyń musylman álemine jat nárse dep túıgen qarapaıym halyqtyń kózin ashý maqsatynda edi. Sondyqtan da osylaı negizsiz keltirilgen oılar men aıtylǵan pikirlerge ósip kele jatqan jastarymyz erip ketpeýi qajet.

Sóz sońyn t.ǵ.k, dosent Qartabaeva Erke Tamabekqyzy alyp, Ybyraı Altynsarınniń eshkimniń nusqaýynsyz óz halqynyń qamyn jep, barynsha qoǵamdaǵy saýatsyzdyqty joıýdy qalaǵanyn, ár qazaq balasynyń boıyna patrıotızmdi sińdirip, otanshyldyqqa jáne ıslamı tárbıege baýlyǵanyn, sonymen qatar qazaq ıntellıgensıasynyń paıda bolýyna birden-bir úles qosqandyǵyn, ulttyq tárbıe berýdiń bastamashysy ekendi týraly aıtyp, dıskýssıany qorytyndylady.

Keń-baıtaq dalaǵa alǵash bolyp bilim qońyraýyn shalǵan, ulty úshin aıanbaı eńbek etip, qazaq balalaryn bilimmen sýsyndatqan, qoǵamnyń uly qaıratkerin memlekettik dengeıde ulyqtap, dáriptep óterimiz naq aqıqat.

A.N. Ábdinazar, Ál-Farabı atyndaǵy QazUÝ 1-kýrs magıstranty, Tarıh fakúlteti

---