InfoHub Logo

Árbir mektep bitirýshi jannyń shákirttik beınesin eshbir fotosýretshiniń kómeginsiz-aq sana túkpirinde saqtap qala alatyn bir jan bar bolsa, ol - onyń ustazy. Ustaz - óziniń eseıgen shákirtimen júzdesip turyp-aq osy bir eresek jannyń sol kezdegi balań beınesin, onyń synyptyń qaı bóliginde, qaı partada otyrǵanyna deıin kóz aldyna elestete alatyn birden-bir jan. Sebebi shákirt ustazdyń óziniń mektepke jas maman bolyp kirip, zeınetkerlik demalysqa shyqqanǵa deıingi sanaly da maǵynaly ǵumyrynyń eriksiz bir ajyramas bólshegi. Osy bir balań beıne ustazǵa erekshe túrde jaqyn. Ustaz búgingi aldynda otyrǵan shákirtterimen ǵana emes, ótken shaqtaǵy shákirtteriniń osy bir beınesimen de únemi betpe-bet kele alar edi. Naq osyny shákirttiń ózi de sezer, múmkin ustazdyń shákirt janyna jaqyn bolýynyń da bir sebebi - ustazdyń tek ózine bilim berýshi jan ǵana emes, balań kúniniń qasterli kýágeri ekendiginde de bolýy múmkin. Sebebi túlek bolyp ketken jan da eriksiz bala kúnine oralyp otyrady.

Búgingi túlekter - keshegi shákirtter. Ol kúni keshe ǵana óz mektebiniń úzdigi, ónerlisi, bilim nemese basqa da saladaǵy jarystar men saıystardyń jeńimpazdary atandy. Ol osy sátterde óz ata-anasynyń mártebeli maqtanyshy boldy. Osynyń barlyǵynda da onyń janynda ustaz júrdi. Osynyń bárinde de ustazdyń qajyr-qaıraty, bilimi men biligi, eńbegi men shákirt kókiregine senim men jiger týdyrýshy kúsh-qýaty jatty. Shákirt pen ustazdyń birigip maqsatty jolǵa jaýapty daıyndyqtarynyń bastalýy men naqty nátıjelerge qol jetýleriniń arasynda uzaq jol jatady. Bul jol shákirttiń ustazǵa degen senimi men ustazdyń ólsheýsiz eńbeginen quralady.

"Siz maǵan jaqsylyq týraly aıtyp edińiz, ustaz". Eger eseıgen shákirt ózine osylaı dese, ustaz munyń ustazdyq ǵumyrynyń dál qaı jyly, qaı saǵatynda aıtylǵandyǵyn jadyna ala almaýy múmkin. Biraq maǵyna basqada - ustazdyń synypta turyp aıtqan jaqsylyqqa toly mazmunnan turatyn jalǵyz aýyz sózi shákirt sanasynda saqtalyp, kókireginde qalyp qoıǵandyǵymen qundy. Al ustaz aldynan ustazdyq ǵumyrynda naq osyndaı qanshama shákirtter ótetindigin eskersek, ustaz eńbeginiń ólsheýsiz uǵymǵa toly ekendigin kórýge bolar edi. İzgilik mazmuny shákirt sanasynda nege qaıta-qaıta jańǵyryqty, munyń sebebi synyp syrtyndaǵy beıtarap janǵa qaraǵanda shákirt aldyndaǵy ustaz aýzynan shyqqan bir aýyz sózdiń anaǵurlym qýatty, anaǵurlym senimdi, anaǵurlym bolashaqqa jol silteýshi bolyp estiletindiginde. Sebebi ustaz - óz kásibiniń sheberi.

Keshe. Búgin. Erteń. Ustazdyń jan-dúnıesi men tabıǵatynda osy bir uǵymdar qanshalyqty aıyrmashylyq týdyra alady. Esh ýaqytta ózgermeıtin bir uǵymdar bar. Ol ustazdyń óz shákirtterine degen ustazdyq júrekten týatyn súıispenshiligi, olardyń isine baǵa berýdegi ádilettiligi, oqýshysynyń boıyndaǵy bilimine degen qurmeti. Shynaıy shákirt boıynda da esh ýaqytta ózgermeıtin bir qasıet bar. Ol óziniń ustazyna degen adaldyǵy. Bilim berýdiń tehnologıasy jańǵyryǵýy, oqytýdyń ádis-tásilderi jetildirilýi múmkin. Biraq keshege de, búginge de, bolashaqqa da tán ortaq nárse sol - ustazdyń osy bir ustazdyq bolmystyń aıasynan tabyla beretindigi. Ustaz - Ultqa qyzmet etýshi. Salıqaly shákirt tárbıeleýshi. Taǵylymdy eńbek týdyrýshy. Azat oıdyń ıesi. Ol - óz qoǵamynyń Zıaly jany. Búginginiń de, bolashaqtyń da ustazynyń jan-dúnıesinde osy bir bolmys jata beretindigi aqıqat.

Qońyraý soǵyldy. Jas baldyrǵan mektepke asyqty. Bilim ordasyn jaǵymdy jańalyqtar qýantty. Muǵalim mereıli kásibine qaıta kiristi. Taǵy da Ustaz merekesi esik qaqty.

Endeshe, merekeńiz qutty bolsyn, Ustaz!

---