InfoHub Logo

Bloomberg agenttiginiń málimetinshe, qazaqstandyq qurylys salasynyń iri ókilderi — Shahmurat Mútálip pen Nurlan Artyqbaev elimizdiń strategıalyq nysandarynan úles alýdy kózdep otyr. Áńgime taý-ken salasynyń alpaýyttary "Kazsınk" pen "Qazaqmys" korporasıalary jaıly.

Bedeldi basylymnyń ınsaıderlik derekkózderine súıensek, Integra Construction KZ kompanıasynyń ıesi Shahmurat Mútálip Glencore halyqaralyq treıderinen "Kazsınktiń" 70% úlesin satyp alý boıynsha kelissóz júrgizýde.

Al Qazaq Stroy quryltaıshysy Nurlan Artyqbaev "Qazaqmys" korporasıasyn óz qolyna alýy múmkin degen boljam aıtyldy.

Alaıda, Bloomberg derekkózderi ázirge naqty kelisim joq ekenin eskertedi. Baǵa men tólem sharttary áli tolyq bekitilmegen, sondyqtan mámile sońǵy sátte júzege aspaı qalýy da ǵajap emes.

Jańa "qojaıyndar" kimder?

Búginde "Qazaqmys" tobynyń negizgi baqylaýshysy — Vladımır Kım (70% úles). Ol Forbes tiziminde Qazaqstannyń eń baı adamdarynyń úshtigine kiredi, baılyǵy 5,7 mlrd dollarǵa baǵalanǵan. Qalǵan 30% úles Edýard Ogaıǵa tıesili.

Al "Kazsınktiń" negizgi ıesi — shveısarıalyq Glencore (69,74%). Qalǵan 29,82%-y memlekettik "Taý-Ken Samuryq" kompanıasynyń enshisinde.

Endi sahnaǵa shyqqan jańa esimderge toqtalsaq:

• Nurlan Artyqbaev — Qazaq Stroy qurylys kompanıasynyń negizin qalaýshy. Baılyǵy 228 mln dollarǵa baǵalanyp, elimizdiń eń baı 50 bıznesmeniniń qataryna kiredi. Ol jaqynda ǵana "Aqtóbe" fýtbol klýbynyń ınvestory atandy jáne "Qazaqtelekom" aksıalarynyń bir bóligine ıelik etedi.

• Shahmurat Mútálip — Integra Construction KZ ıesi. Bul kompanıa temirjol jáne avtojol qurylysymen, iri ınfraqurylymdyq jobalarmen aınalysady.

Taraptar ne deıdi?

Otandyq BAQ ókilderi atalǵan kompanıalarǵa resmı saýal joldaǵan. Qazaq Stroy kompanıasy bul aqparatqa qatysty shuǵyl jaýap berdi.

«Qazirgi kezeńde biz qandaı da bir kelisimderdiń bar-joǵyn rastaı da, joqqa shyǵara da almaımyz. İri bıznes ókilderiniń arasynda túrli kelissózder júrýi zańdylyq, biraq naqty nátıje týraly aıtýǵa áli erte. Bul aqparattar naryqtaǵy alypqashpa sóz bolýy da múmkin», — dep málimdedi kompanıa ókilderi.

Sonymen qatar, Qazaq Stroy kompanıasynyń ıesi Nurlan Artyqbaevtyń qazirgi tańda qurylystan bólek, telekomýnıkasıa jáne óndiris salalaryna ınvestısıa salý múmkindikterin qarastyryp jatqany aıtyldy.

Al Glencore kompanıasy "túsinikteme bermeımiz" dep qysqa qaıyrǵan.