InfoHub Logo

Búıregin 15 mıllıon teńgege satpaq bolǵan qaraǵandylyq raqymshylyqpen bosatyldy

Qaraǵandy turǵynynyń adam aǵzasyn zańsyz satpaq bolǵan áreketi raqymshylyqpen aıaqtaldy. Bul týraly sot úkimine súıengen Stankz News Telegram arnasy habarlady.

Sot derekterine súıensek, qylmys 2025 jylǵy sáýir aıynda bolǵan. Qaraǵandy qalasynyń 30 jastaǵy turǵyny óziniń qaryzdaryn óteý úshin ınternet arqyly búıregin satýǵa sheshim qabyldaǵan. Jelide habarlandyrý jarıalaǵan soń, birneshe usynys alady. Sóıtip, 28 sáýir kúni Aqtóbege baryp, satyp alýshy taraptyń uıymdastyrýymen medısınalyq tekserýden ótedi.

25-30 sáýir aralyǵynda jalǵa alynǵan páterde turyp, aǵzasyn satý prosesin sońyna deıin jetkizýge nıet bildiredi. 30 sáýir kúni oǵan 7,5 mıllıon teńge aldyn ala tólem retinde beriledi. Alaıda zańsyz áreketi iske aspaı, er adam quqyq qorǵaý organdarynyń qolyna túsedi.

Sot úkimimen ol 2025 jyldyń mamyr aıynda bir jylǵa bas bostandyǵynan aıyrylǵan edi. Alaıda Qazaqstan Konstıtýsıasynyń 30 jyldyǵyna oraı jarıalanǵan raqymshylyq aıasynda sottalǵan azamat qylmystyq jaýapkershilikten bosatyldy.

Aıta ketý kerek, Qazaqstanda adam aǵzasyn satý zańmen tyıym salynǵan jáne aýyr qylmys túrine jatady. Qylmystyq kodekste bul áreketke qatysty qatań jaza kózdelgen. Soǵan qaramastan, áleýmettik jaǵdaı men qarjylyq qıyndyqtar azamattardy osyndaı táýekeldi qadamǵa ıtermelep otyr.