Ýaqytynan buryn shattaný: sáttilikke aparar jolyńyzda kedergi bolatyn ádet eken. Kásipker Djon Mashnı osy ádetten qutylǵan soń, isi alǵa jyljı bastaǵan. Djonnyń maqalasynyń aýdarmasyn nazarlaryńyzǵa usynamyz.

 

*******

Jeńimpazdar aldymen jeńedi, tek sodan keıin soǵysqa barady, al jeńilgender shabýyldaǵan soń jeńisti izdeı bastaıdy.

Sun Zy

Osy ádetim jaıly kóp jyldar boıy bilmegen ekenmin. Bul ádet maǵan kóp jaǵdaıda kedergi bolǵan. Tipti kez-kelgen baǵytta damýymdy tejedi deýge bolady.

Endi, bul ádet jaıly bilgennen beri, ony barlyq jerde baıqap qalamyn. Dostarymnyń, áriptesterimniń, tanystarymnyń osy ádetke boı aldyratynyn jıi kóremin.

Osy jaıly buryn-sońdy kóp oılanbaǵan ekenmin. Alaıda, osy ádetten qutylsaq, turaqtylyq pen júıeliliktiń kiltin taba alatynymyzǵa senimdimin.

Eger osyny úırenip alsańyz, eshqashan jeńilis kórmeısiz.

Shyndyqqa úńilsek

Tártip erkindikpen para-par.

Frenk Gerbert, «Dúna»

Adamdardyń basym bóligi ýaqytynan buryn shattanatyny ras.

Men osy ómirlik sabaqty balalarǵa arnalǵan kitaptan úırendim. Meniń dosym Lúk Mardıgán osy kitapty ulymmen birge oqýymdy usyndy: «Jaýynger bóbektiń ómir joly» Djoko Vıllınk.

Kitaptyń mazmuny qarapaıym: júzý bilmeıtin, únemi aınaladaǵy balalardyń mazaǵynyń astynda qalatyn, kóbeıtý kestesin bilmeıtin, bir ret te tartyla almaıtyn balanyń úıine qonaqqa áskerı qyzmet jasaıtyn aǵataıy keledi. Aǵasy balaqaıdyń ózgerip, myqty bolýy úshin shynyǵýyna kómektesti.

Bul balalar men eresekterge arnalǵan tamasha oqıǵa.

Ýaqyt óte kele bala beltemirge birden tórt márte tartylýdy úırendi. Onyń qýanǵany sonsha, shattanyp, máz-meıram boldy. Ol ómirinde osyndaı kórsetkishke qol jetkizbegen edi!

Alaıda aǵasy asa qýana qoımady, sebebi, is áli bitpegen edi.

Maqsat — 10 márte tartylý. Al balaqaı bar bolǵany tórteýin ǵana jasady.

Shattanýǵa sebep joq, áli ýaqyty kelmedi.

Jumysyńdy oryndap bitpeıinshe, erte shattanba

Tuzaqtyń qaıda ornalasqanyn bilýdiń ózi — ony aınalyp ótýdegi alǵashqy qadam bolyp esepteledi.

Djoko Vıllınk

Adam ómirinde bir jaqsylyq oryn alǵan kezde psıhologıalyq jeńildik sezine bastaıdy. Qandaı da bir sebepten talpynysy azaıyp, bosańsý paıda bolady. Kóp adamdar úshin ýaqytynan erte qýaný ádetke aınalyp ketken.

Djoko Vıllınk bizge mańyzdy úndeý jiberýde: jumysyńdy aıaqtamaı, shattanba. Joldaryńdaǵy kishkentaı jeńister — bul jaqsy, alaıda senderge áli talaı maıdanda jeńiske jetý kerek.

Mańyzdy isterge barar jolda kishkentaı jeńisterdiń kedergi bolýyna jol bermeńder.

Vıllınktiń kitabyndaǵy kishkentaı balaqaı óziniń kishkentaı jeńisine qýanyp jatqanda, aǵasy jaı ǵana «Jaqsy» deıdi de, ári qaraı jumysyn jalǵastyra beredi.

Erejeniń buzylýy

Danyshpan bolý óneri — neni nazarǵa almaý keregin túsinýde.

Ýılám Djeıms

Kóp adamdar tabysqa jeteleıtin qıyn jumystardy unata bermeıdi. Sondyqtan jeńistiń alǵashqy dámin, jumysty osymen támamdaýǵa bolady degen belgi dep qabyldaıdy.

Bul — qatelik. Men de osy qatelikti talaı ret jasadym!

— Kóp jyl buryn ózimniń aýdıo-vıdeo kásibim úshin jańa qurylǵy satyp alǵym keldi. Jumysta paıdalanbaǵan demalys kúnderim jınalyp qalǵan eken, basshydan sol kúnderdiń aqysyn tóleýin suradym. Men ádeıi demalys almaǵan bolatynmyn, óıtkeni kompanıa sot úrdisin júrgizip jatqandyqtan ýaqytty beker jibermeý kerek edi. Basshy birden «Iá» degenine tań qaldym, qýanyshym qoınyma sımady. Men $3000 alamyn dep oılap, aqsha tabýdyń basqa joldaryn tipti izdemeıtin boldym. Biraq, erte qýanyp qoıǵan ekenmin. Basshy meniń suranysymdy joǵarǵy jaqqa jibergende, ol jaqtan suranysym qabyldanbady degen jaýap keldi. Sol kezde qatty qamyqtym. Ýaqytynan buryn kelgen osy qýanyshym, sol ýaqyt arasynda atqaryp úlgeretin jumystarymnyń barlyǵyn tejep qoıýǵa sebepshi boldy.

— Alǵash ret qomaqty qarjynyń chegin qolyma alǵanda, qatty qýandym. Sonymen qatar keremet ótken tegin saıahatqa joldama aldym. Azyn aýlaq aqsham da bar edi. Aqyr sońynda osy qarajat pen saıahatqa qol jetkizýge kómektesken isimdi jalǵastyrýdy toqtatatyp tastadym. Tabys pen qýanysh meniń ári qaraı damýymdy tejep qoıdy. Men ýaqytynan buryn qýanǵan ekenmin. Maǵan buryn istegen jumystarymdy qaıta jasaýyma týra keldi.

— Kóp jyldar boıy jazýdy qaladym. Bir nárse jazsam qatty qýanatynmyn. Biraq, turaqty jazyp júrmedim. Mine, osy nárse meniń ary ári qaraı damýyma kesirin tıgizdi.

Syılyǵyn satty

Eger tuzaqty baıqamaı qalsańyz, ańshyny kinálamańyz.

T. T. Eskýrel

Kóp jyl buryn Olımpıadalyq oıyndardan jeńgen spartalyq jigit týraly oqyǵan edim. Jeńisi úshin ol keremet syıǵa ıe boldy. Bul — jeńistiń belgisin bildiretin altyn men asyl tastar kómkerilgen óner týyndysy edi. Jaýynger keremet syıdy qýana qabyl aldy. Bul buıym onyń jeńisiniń ǵalamat kórsetkishine aınaldy.

Jarystan soń, kelesi kúni jigit syılyǵyn satyp jiberdi de, ári qaraı jattyǵýyn jalǵastyra bastady.

Syılyq — bul jaýyngerdiń jetistigin aınalasynaǵylardyń qabyldaýy úshin qajetti qural ǵana. Shyn máninde jaýynger óziniń ishki jeńisine basa mán bergen edi.

Kez-kelgen jeńisti toılaý kezinde basqa da mańyzdy isterdi nazardan tys qaldyrmańyz. Eger bireýler sizdi kishkentaı jeńisińiz úshin quttyqtap, oǵan tamsanyp jatqanda, Vıllınktiń keıipkerin esińizge túsirińiz. Ózińizge «jaqsy» jetistik deńiz de, ári qaraı sol qarqynmen isińizdi jalǵastyrýǵa tyrysyńyz.

Júıelilik — mańyzdy máni bar ádet

Júıelilik — qarqyndylyqtan da mańyzdyraq.

Krıstofer Sommer

Júıelilik — kemeldilikke bastar jol. Ýaqytynan buryn shattaný ádeti sizdi tyǵyryqqa ákep tireýi múmkin. Odan qutylyńyz da, alǵa qaraı jyljyńyz. Jumys aıaqtalǵanda ǵana shattana bilińiz. Óz kásibińizge qamqorlyq jasańyz da, maqsattaryńyzǵa qaraı júrińiz.

Óıtkeni, eń mańyzdy nárse — toılaý emes, jeńis!

---