InfoHub Logo

Avtory:
Ǵabıden QOJAHMET,
Qyzylorda qalasy

Bul - bizdiń kók týymyz jelbiregen!

Kónbesten bodandyqtyń tusaýyna,
Aınalǵan azattyqtyń nyshanyna.
Tanytqan órligiń men eldigińdi,
Syıǵyzyp tynyshtyqty qushaǵyńa.
Kúlli álem sodan biler seni tanyp,
Balanǵan erkindiktiń mysalyna.
Jıhanǵa eńse tiktep kóz salǵyzǵan
Bul - bizdiń kók týymyz jelbiregen!

Ózgege ústemdigin tanytpaǵan,
Degendeı jerim de - keń, alyp - dalam.
Altyn kún aıasynda nurǵa oranyp,
Qyran qus bıikte ushyp qalyqtaǵan.
Kózińe ottaı ystyq basylatyn,
Qaraýdan ul men qyzy jalyqpaǵan.
Qaraǵan janda áseri tunyp turǵan
Bul - bizdiń kók týymyz jelbiregen!

Tanytqan jiger kúshti erteńińnen,
Ol barda, ózgemen el teń kóringen.
Kúmbezdi aspan tústes tutastyǵy
Ultyńnyń oıýymen kómkerilgen.
Beretin jas balaǵa shalqar shabyt,
Sol urpaq án ǵyp aıtqan ór kóńilden.
Tálimin kóp sińirgen sábıine
Bul - bizdiń kók týymyz jelbiregen!

Kelisim ár kez janjal bastatpaǵan,
Áskeri qurmet etip qas qaqpaǵan.
Barǵanda óz el basshyń shet saparǵa
Sol eldiń aspanynda asqaqtaǵan.
Seni erkin memleket dep moıyndatqan,
Júzińdi tómendetip, jasqantpaǵan.
Bútin bir el atynan sóılep turǵan
Bul - bizdiń kók týymyz jelbiregen!

Kútkizbeı sańlaǵyńnan beker úmit,
Ul - qyzyń synnan talaı óte bilip.
Turǵanda jeńis - shyńnyń tuǵyrynda,
Aspandap bara jatqan kóterilip.
Asqaq ún ánurannyń egizindeı,
Kórgen jan bolmysyńdaı keter uǵyp.
Sondaǵy qýanyshyńmen tolqyndanǵan
Bul - bizdiń kók týymyz jelbiregen!

Boıynda ult minezi óriletin,
El dese, júrekten jas tógiletin
Ár janǵa alýan Týdyń arasynan
Bıiktep erekshe, ystyq kórinetin.
Baıqalǵan Dalamyzdyń belgisindeı,
Taqqyzbas ózgelerden elińe syn.
Tarıhtan talaı mysal túıindetken
Bul - bizdiń kók týymyz jelbiregen!

Urpaqtyń qaster bolyp uǵymynda,
Aınalyp ár bóligi uly uǵymǵa.
Kók týyń eldigińniń kórinisindeı,
Jelbireı bersin asqaq tuǵyrynda!
Qasterli Táýelsizdik jarshysyndaı
Maqtanysh bolsyn qyz ben búgin ulǵa.
San júrek ulyqtaǵan uly baıraq
Bul - bizdiń kók týymyz jelbiregen!