InfoHub Logo

1860 jyldardyń basynda qyzylqurt, noǵaı rýlaryn Dáýletkereı bıleıdi. Ákesi Shyǵaı bolǵanymen, Dáýletkereı el bıleý jumysyn jaqsy kórmeıdi. Tek «ata zańy» boıynsha az ýaqyt bul dárejege ıe bolady. Biraq Dáýletkereıdiń bul rýlardy bıleýi Qurmanǵazyǵa jaman tımeıdi, óıtkeni osy jyldarda eki kúıshi tanysady. Biri — Isataıǵa búıregi burǵan, qyzylqurttan shyqqan Qurmanǵazy, biri — Bókeıdiń kishi inisi Shyǵaıdan týǵan tóre Dáýletkereı bolyp kezdesip, ómir jaǵdaıynda kózqarastary alshaq jatqanymen, olardy jaqyndastyratyn úlken kúsh paıda bolady. Ol kúsh — óner kúshi, kúı kúshi bolyp shyǵady. Birinshi kóriskende bir-birine qońyr salqyn bolǵanymen, az ýaqytta-aq beıtanystyq muz erip, eki kúıshi jalpy tildi tez taýyp ketedi. Olaı deıtinimiz — Qurmanǵazy otyrǵan, júrgen jerlerinde únemi Isataıdyń, Mahambettiń áńgimelerin kóp aıtady. Qalaı degende ondaı áńgimeler Dáýletkereıge unaı bermeıdi. Biraq keıin Dáýletkereıdiń qıtyǵyna tıe bermeıin dep, Qurmanǵazy ol otyrǵan jerde «bas jaqqa» bara bermeıdi.

Qyzylqurttyń jer daýymen bir kúni jaqsy kóretin shákirtiniń biri Kókbalany alyp, Papastyń aýylyna keledi, Papas bı kúıshini jaqsy qarsy alady. Qurmanǵazynyń kelgen jumysyn bitirip, qyzylqurttyń paıdasyna máseleni sheship beredi. Áýeli Papas bir kúı tartady. Kúı Qurmanǵazyǵa qatty unaıdy. «Mynaý ne degen kúı edi, tym saırap tur eken?» deıdi Qurmanǵazy. Papas kúıdiń atynyń «Bulbul» ekenin aıtady. Qurmanǵazy sol arada bir kúı tartady. Endi kúıdiń atynyń ne ekenin Papas suraıdy. Qurmanǵazy: «Bul meniń bulbulym edi» deıdi. Sonda Papas turyp: «Joq, aǵa, mynaý bulbul emes, bulbuldyń qurǵyry ǵoı», — deıdi. Sodan kelip bul kúı «Bulbuldyń qurǵyry» atanyp ketedi.

---