InfoHub Logo

Býrabaı aýdanyndaǵy Shýchınsk qalasynda qysqy fýtbol maýsymyna arnalǵan alǵashqy jabyq sport alańy qyrkúıekte paıdalanýǵa beriledi. Bul nysan qala turǵyndary men qonaqtaryna arnalǵan sporttyq-mádenı ortalyqqa aınalmaq.

Bul týraly Infohub.kz aqparat agenttigi habarlaıdy.

Jańa sport kesheniniń erekshelikteri

Qurylys jumystarynyń 50-60 paıyzy aıaqtalǵan nysan 23h35 metr kólemdegi fýtbol alańyn qamtıdy. Odan bólek, munda basketbol jáne voleıbol oınaýǵa da múmkindik bolady. Sport kesheninde oıynshylarǵa arnalǵan kıim aýystyratyn bólmeler, dýsh jáne 50 adamǵa arnalǵan trıbýna qarastyrylǵan.

«Bul – bizdiń tarapymyzdan qalaǵa kórsetiletin qamqorlyq. Ákimdikpen birlesip, barlyq qurylys jumystaryn tek bıznes esebinen júrgizip jatyrmyz. Mundaı jabyq fýtbol alańy Shýchınskide buryn-sońdy bolmaǵan. Nysan qurylys salýshynyń balansynda qalady, al sport klýbtary múldem tegin jattyǵa alady», – deıdi jobanyń bas merdigeri, «Atameken Invest Group» JSHS dırektory Denıs Sımonov.

Jyl boıy jumys isteıtin nysan

Jabyq alań jyl boıy jumys isteıtin bolady. Ondaǵy jylý júıesi qysqy maýsymda da oıyn ótýine múmkindik beredi. Bul jańalyq Shýchınsk qalasyndaǵy sport komandalarynyń jattyǵý máselesin sheshýge yqpal etedi. Buǵan deıin komandalar mektepter men ýnıversıtetterdiń sport zaldarynda jattyǵyp kelgen.

«Búginde Shýchınsk qalasynyń sport komandalary mektepter men ýnıversıtetterde jattyǵyp júr. Bul sport nysany bul máseleni sheshedi. Ol jyl boıy jumys isteıtin bolady, jylytylady. Onda eresekter de, balalar da jattyǵa alady», – dep qosty Denıs Sımonov.

Qurylys kompanıasy nysandy 2026 jyldyń 1 qyrkúıegine deıin paıdalanýǵa berýdi josparlap otyr. Jobanyń jalpy quny 250 mıllıon teńgege baǵalanady.

Mádenıet úıi men ákimniń kezdesýi

Sport nysanynan bólek, Aqmola oblysynyń ákimi Marat Ahmetjanov Shýchınsk qalalyq mádenıet úıiniń de jaǵdaıyn qarady. Jaqynda ǵana eski ǵımarattyń ornyna salynǵan mádenıet úıinde oblys basshysy jergilikti ujymmen jáne Qatarkól aýylynyń «Garmonıa» horymen kezdesti. Hor ujymy kelesi jyly 25 jyldyq mereıtoıyn atap ótedi.

«Kóńil-kúı tamasha. Mádenıet úıindegi jóndeý jumystary óte jaqsy júrgizilgen. Biz munda alǵash kelgende, tań qaldyq», – dep rızashylyǵyn bildirdi hor múshesi Natalá Kazakova.

Ákim hor ujymyna arnaıy gravırovkamen «Aqmola oblysy ákimi M. Ahmetjanovtan mádenıet úıi ujymyna» degen jazýy bar kásibı baıan syılady. Ánshiler jańa aspapty synap kórip, repertýaryndaǵy ánderdi oryndap berdi.

«Bul biz úshin kópten kútken baıan. Ózimniń de baıanym bar edi, biraq 30 jylda tozyǵy jetip, jóndeýge kelmeı qaldy. Osyndaı qamqorlyqtaryńyzǵa rahmet», – dedi hordyń baıanısti Mıhaıl Kolomıes.

Býrabaı aýdanynyń týrısik áleýetine toqtalǵan oblys ákimi Marat Ahmetjanov: «Býrabaı – Qazaqstannyń injý-marjany. Jyl saıyn ony jarty mıllıonnan astam týrıs tamashalaıdy. Árıne, olarǵa jaǵymdy áser qaldyrýymyz kerek. Sonymen qatar, Shýchınskide 50 myńnan astam adam turady. Olar úshin de qolaıly orta qalyptastyrý qajet. Úlken jumys atqaryldy. Jańa nysandar Shýchınsk qalasynyń turǵyndary úshin mádenı jáne sporttyq demalys ortalyǵy, al óńir qonaqtary úshin tartymdy jer bolady», – dep atap ótti.