Qarmańbaı, qarap jatyp baq kútýge,
İzdenbeı alasuryp, taq kútýge,
Taǵdyrda, bir taqtaıda jazýly dep,
Ár iske kim úıretti shaq kútýge?
Sharq uryp erikke umtylǵan ushqyr jandy,
Qaınaǵan tamyrdaǵy ystyq qandy
Tutqyn ǵyp kim qamady? Kim sýytty?
Kim aldy qalyń qaırat, kúshti, áldi?
Keshegi arystandy aıbyny zor,
Júrekti jolbarystaı qaıraty mol
Aıyryp ar-namystan, kúshten, esten,
Kim qyldy shala-jansar bir qorqaq qul?!
Aqylǵa, jan-júrekke kisen saldy,
Kórmeıtin kózdi ker ǵyp arty-aldy.
Úıretip din dep quldyq, qorqaqtyqty,
Qandaı qul bizge molda bola qaldy?!
Oılamaı, qorqaq quldyń tiline erip,
Jaı jatyp, táýekelge tizgin berip,
Minekeı, aıryldyq qoı baqtan, taqtan!
Qaıteıin, ásirese, esil erik!
Joq endi, jatý bolmas bos eńbeksiz,
Jalbaryp: «Jasaǵan!» dep jas tókpespiz.
Óziń de, sóziń de ket bizden aýlaq,
Jany ólgen, júregi ólgen mundar keksiz.
Biz jańa kórdik tańnyń jeli eskenin,
Salqynmen seskendirmek bop eskenin,
Syldyrlap sý, sybyrlap japyraqtar:
«Esińdi jı endi, alash, tur!»- deskenin!
Mine, Kún! Sáýlesi altyn jerdi qushty,
Jaryqqa qýanysyp qustar ushty.
İzgi oımen erik tilep, jaryq tilep,
Ushamyz biz de jıyp esti, kúshti!

---