1.
Araladym biraz kún
Edildiń saǵa ólkesin.
Qazaqty kórdim qýarǵan
Júk tasyp, tesken jelkesin.
Balyq aýlap bozaryp,
Jaılaý qylǵan kól tósin.
Seleńdeıtin seleńge
Mujyqtyń ańdyp bólkesin.
Sóz sóılese, sabaıtyn
Orystyń «sovsem...» «tolkosin...
Oılanbasa, mynaý kúı
Keltirer kimniń kúlkisin?!

2.
Salaly sonaý saǵada
Biraz el bar Baıuly.
Jorǵasy men júırigi -
Qaltyldaǵan qaıǵy.
Quryq salǵan qulyny -
Týlatyp shanyshqan jaıyny.
Qalaǵyńdaı qaıyqtyń
Sirińke qara zaıyby!
Qara sý, balyq - qoregi,
Joqtyqtan joq-aý aıyby.
Bul kúıge túspeı, qutylar
Qazaǵyńnyń qaı uly?!

3.
Aýylǵa jettik qaıyqpen
Kókjıekke kún bata.
Bir lashyqtyń tusyna
Tura qaldyq ún qata.
«Qosh keldiń!»- dep qarsy aldy
Aq saqaldy bir ata.
Bes bekiresin sekirtip,
Alyp kep, dedi: «Aq bata!»
Bekiresin jep shúkir ǵyp,
Biz de jattyq aı bata.
Aı bata degen jaı bir sóz,
Janǵa bir aýyr oı bata!

4.
Bir aýyl berish ishinde ek
Qonǵan ózen boıyna.
Kún shyqty, qurban meıramy
Bastaldy qurban soıyla.
Birazdan bitken bozbala
Toıyp ap qurban qoıyna,
Shómeledeı shashtary,
Kúıekteı keset moıynda,
Dúrkiresip jóneldi
Selenge - Sergeı toıyna...
Elińniń jaıy osylaı,
Kele me esh zat oıyńa?

5.
Baǵlan jeıtin qart, meıli,
Balyq jep kirsin kórine.
Allashyl, aıtshyl moldasy
Shyqsyn-aq jumaq tórine.
Qalada júrgen inishek,
Qaıys býǵan beline -
Kóz qyryńdy sala kór
Qazaqtyń qyrshyn tóline.
Maqsatyń bolsa sherli eldi
Shyǵarý ómir órine,
Qash qaladan, qaraǵym,
Elińe qaıt, elińe!

---