InfoHub Logo

Reseıdiń Tatarstan Respýblıkasyndaǵy «Drýjba» munaı qubyrynyń «Kaleıkıno» stansıasyna drondar shabýyldap, órt shyqty. Bul jaǵdaı Qazaqstannyń munaı eksporttyq baǵyttaryna áser ete me degen suraqtar týdyrdy. Qazaqstan Energetıka mınıstrligi bul oqıǵanyń eldiń munaı tasymalyna eshqandaı áser etpegenin naqtylady.

Bul týraly Infohub.kz aqparat agenttigi habarlaıdy.

«Kaleıkıno» stansıasyndaǵy jaǵdaı

Almetevsk qalasynda 23 aqpanǵa qaraǵan túni «Kaleıkıno» munaı aıdaý stansıasynda órt boldy. Jergilikti turǵyndar birneshe jarylys estigenin aıtty. Ákimdiktiń málimetinshe, órt drondardyń synyqtary qulaǵannan keıin ónerkásiptik aımaqta bastalǵan. Qaza tapqandar men zardap shekkender joq.

«Kaleıkıno» stansıasy «Transneft» júıesindegi eń iri stansıalardyń biri. Ol ártúrli aımaqtardan munaı qabyldap, ony aralastyryp, saqtap, ári qaraı magıstraldy munaı qubyrlaryna jiberedi. Bul baǵyttardyń biri – Eýropaǵa eksporttalatyn «Drýjba» munaı qubyryna ketedi.

Mınıstrliktiń resmı málimdemesi

Qazaqstan Energetıka mınıstrligi Tatarstandaǵy oqıǵanyń eldiń munaı tasymalyna áser etpegenin habarlady.

«Tatarstandaǵy oqıǵaǵa baılanysty mınıstrlik habarlaıdy: bul jaǵdaı qazaqstandyq munaı tasymaldaý prosesine áser etken joq. Júk jóneltýshilerden shıkizatty qabyldaý jáne magıstraldy munaı qubyrlary júıesi boıynsha ony ári qaraı aıdaý bekitilgen kestege sáıkes shtattyq rejımde júzege asyrylýda. Qazaqstandyq munaıdyń tranzıti nemese eksporty boıynsha qandaı da bir shekteýler tirkelgen joq», - delingen mınıstrliktiń habarlamasynda.

Qazaqstannyń munaıy «Kaleıkıno» stansıasymen tikeleı baılanysty bolmaǵanymen, ol osy júıe arqyly ótedi. Atyraý – Samara qubyrymen Reseıge jetken shıkizat «Transneft» magıstraldyq jelisine túsip, ártúrli baǵyttarǵa bólinedi. «Kaleıkıno» osy júıeniń mańyzdy toraptarynyń biri bolyp sanalady.

Burynǵy oqıǵalar men balama joldar

Buǵan deıin Qazaqstan Syrtqy ister mınıstrligi Qara teńiz termınalyna bara jatqan úsh tankerge jasalǵan shabýyldarǵa qatysty alańdaýshylyq bildirgen bolatyn. Sondaı-aq, Qyzyl teńizdegi jaǵdaıǵa baılanysty Qazaqstannyń Kaspıı qubyr jelisi konsorsıýmy (Kaspııskıı trýboprovodnyı konsorsıým - KTK) arqyly munaı eksporttaý kólemi qańtar aıynda 45 paıyzǵa azaıǵan edi.

Osy máselelerge baılanysty Qazaqstan munaı jetkizý baǵyttaryn ózgertýge májbúr boldy.