InfoHub Logo

Fransıadaǵy aýksıonda Eıfel munarasynyń burynǵy vınttik baspaldaǵynyń bir bóligi 450 myń eýrodan astam baǵaǵa satyldy. Bul týraly DW basylymyna silteme jasap, Tengri Life habarlady.

Bul týraly Infohub.kz aqparat agenttigi habarlaıdy.

Satylymǵa shyqqan baspaldaq seksıasy shamamen 2,7 metr bıiktikte bolyp, 14 baspaldaqtan turady. Aýksıon aldynda onyń quny 120-150 myń eýro dep baǵalanǵan edi. Alaıda, aty-jóni qupıa saqtalǵan fransýz kolleksıoneri eń joǵary baǵany usynyp, bul tarıhı jádigerdiń ıesi atandy.

Eıfel munarasynyń tarıhyndaǵy mańyzdy bólik

Atalǵan baspaldaq seksıasy Eıfel munarasynyń ekinshi jáne úshinshi qabattaryn baılanystyrǵan. Dál osy vınttik baspaldaqpen 1889 jylǵy Dúnıejúzilik kórmege kelgender kóterilgen bolatyn. Sol kórme úshin ınjener Gústav Eıfel munarany turǵyzǵan edi.

Salmaǵy 1,4 tonnaǵa jýyqtaıtyn bul qurylym 40 jyldan astam ýaqyt boıy jeke koleksıada saqtalyp kelgen. Ony satý aldynda Eıfel munarasymen jumys isteıtin mamandar qalpyna keltirgen.

Baspaldaqtyń demontajdalý sebebi

1983 jyly munarany jańǵyrtý jumystary kezinde ekinshi men úshinshi qabat arasyndaǵy baspaldaq demontajdalǵan. Ol kezde baspaldaq kelýshiler úshin qaýipti dep tanylyp, zamanaýı lıfttermen almastyrylǵan.

Sodan keıin bul qurylym 24 túrli bólikke kesilgen. Búginde onyń jekelegen bólikteri Nú-Iorktegi Erkindik músininde, Japonıadaǵy murajaılar men jeke baqtarda, tipti Dısneılendte de bar. Qalǵandary iri jeke koleksıalarǵa qosylǵan.

Eıfel munarasy 1889 jylǵy Dúnıejúzilik kórmege arnalyp salynǵan. Bastapqyda bul qurylys ýaqytsha dep eseptelip, kórmeden keıin bólshekteý josparlanǵan. Alaıda, ýaqyt óte kele munara Parıjdiń basty sımvolyna aınalyp, búginde álemdegi eń kóp baratyn oryndardyń biri bolyp sanalady.