InfoHub Logo

Ekibastuz qalasynda eki mas azamat emdelýshiniń dosy retinde qalalyq aýrýhananyń qabyldaý bólimine kelip, medısına qyzmetkerlerine qol jumsady. Shabýyl saldarynan dáriger men medbıke jaraqat alyp, aýrýhanaǵa jatqyzyldy. Polısıa kúdiktilerdi ustady.

Bul týraly Infohub.kz aqparat agenttigi habarlaıdy.

Oqıǵanyń mán-jaıy

12 sáýirde Ekibastuz qalalyq aýrýhanasynyń qabyldaý bólimine jaq súıeginen jaraqat alǵan er adam kelgen. Onymen birge eki joldasy bolǵan, úsheýi de mas kúıde bolǵan.

Dáriger tekserý kezinde olardyń bireýinen kabınetten shyǵyp turýyn ótingen. Alaıda, ol bas tartpaı, agressıvti minez tanytyp, tipti dóreki sózder aıtyp, mamandardyń jumysyna kedergi keltirgen.

Kabınetten ketý týraly qaıta aıtylǵan talaptan keıin janjal ýshyǵa tústi. Er adamdardyń biri esikti ıterip ashyp, esik dárigerdiń basynan soǵylǵan. Travmatolog deboshırlerdi syrtqa shyǵarýǵa tyrysqanda, olar qarsylyq kórsetken.

«Er adamdar dárigerdiń basy men denesine birneshe ret soqqy jasady. Alǵan jaraqattary saldarynan dáriger esinen tanyp qaldy. Áriptesin qorǵamaq bolǵan medısınalyq meıirbıke de shabýyldaýshylardyń qolynan zardap shegip, dene jaraqattaryn aldy», - dedi oqıǵa kýási.

Polısıanyń málimdemesi

Pavlodar oblystyq polısıa departamentiniń baspasóz qyzmeti medısına qyzmetkerlerine qatysty zorlyq-zombylyq faktisi boıynsha qylmystyq is qozǵalǵanyn habarlady.

«Oqıǵa ornyna jedel jetken polısıa qyzmetkerleri sol jerde úsh kúdiktini ustady. Onyń ekeýi ýaqytsha ustaý ızolátoryna qamaldy, al bireýi polısıanyń baqylaýynda arnaıy palataǵa ornalastyryldy», - dep bólisti oblystyq PD ókilderi.

Polısıa oqıǵanyń beınejazbasyn jarıalady. Kadrlarda bir er adamnyń dárigerdi qulatyp, aýrýhana aldynda soqqyǵa jyqqany kórinedi. Zardap shekken medısına qyzmetkerleri jaraqattarymen aýrýhanaǵa jatqyzyldy.

Polısıa medısına qyzmetkerleri men jedel qyzmetterge qatysty zorlyq-zombylyqqa «múldem tózbeýshilik» qaǵıdatyn ustanatynyn atap ótti.