InfoHub Logo

Ekibastuz qalasyndaǵy jeke úıden eki adamnyń múrdesi tabylǵan qaıǵyly oqıǵaǵa qatysty jańa málimetter jarıalandy. Aldyn ala boljam boıynsha, marqumdardyń biri eki jyldaı, ekinshisi birneshe aıdaı úı ishinde jatqan.

Bul týraly Infohub.kz aqparat agenttigi habarlaıdy.

Turǵyndardy dárigerler alańdatqan

Oqıǵanyń mán-jaıyna úńilsek, aldymen medısına qyzmetkerleri alańdaýshylyq bildirgen. Sebebi, bir pasıent belgili bir ýaqyt boıy tekseriske kelmegen. Keıin bul aqparat tıisti organdarǵa jetkizilgen.

Kórshiler ne deıdi?

Kórshilerdiń aıtýynsha, buryn bul otbasy qalypty ómir súrgen, aralasyp-quralasyp turǵan. Alaıda, sońǵy ýaqytta úı ıesi áıel adam múldem eshkimdi kirgizbeı, ózine-ózi tyǵylyp qalǵan.

«Qalypty otbasy edi, jaqsy aralasatynbyz, bir-birimizdiń úıimizge baratynbyz. Sońǵy kezde múldem eshkimdi kirgizbeı qoıdy. «Kúıeýińizdi, Sasha aǵamdy kópten kórmedik» deımiz. Eshteńe aıtpaıdy. Sońǵy kezde múldem tanymaıtyn boldyq», - deıdi kórshisi Omırtaı Sháripjanov.

Úı ıesiniń qasyndaǵy úıdi jaldap turatyn týys ápkesi de bul jaǵdaıdan habarsyz bolyp shyqty. Jergilikti turǵyndardyń sózinshe, eki áıeldiń arasyndaǵy qarym-qatynas múldem bolmaǵan.

Balanyń jaǵdaıy

Oqıǵa oryn alǵan úıde áıeldiń nemeresi, alty jasar qyz bala bolǵan. Ol birneshe kún boıy Maıqaıyń aýrýhanasynda tekseristen ótti.

«Qazir balanyń psıhoemosıonaldy jaǵdaıy turaqty. Oǵan tek mamandar ǵana emes, bala psıhology da kómek kórsetedi. Belgili bir ýaqyttan keıin barlyq rásimderdi saqtaı otyryp, bala Ekibastuz qalasynyń Balalar qoldaý ortalyǵyna ornalastyrylady», - dedi balalar quqyǵyn qorǵaýshy Saýle Shákenova.

Úı ıesi áıel adamnyń jaǵdaıyn baǵalaý úshin psıhıatrıalyq aýrýhanaǵa jetkizildi.

Polısıa ne deıdi?

Oblystyq Polısıa departamenti qylmystyq is qozǵalǵanyn habarlady. Qazirgi tańda jaǵdaıdy anyqtaý úshin qajetti tergeý áreketteri júrgizilip jatyr.