InfoHub Logo

Elimizge qoldanylǵan shınalar zańsyz jolmen kirgizilýde — Bas kólik prokýratýrasy dabyl qaqty

Qazaqstanǵa qoldanylǵan avtokólik shınalarynyń zańsyz ákelinýi beleń alyp tur. Bul týraly Bas kólik prokýratýrasy resmı túrde málimdedi. Bıylǵy sáýir-maýsym aılarynda bir ǵana óńirde 1,5 myń tonnaǵa jýyq paıdalanylǵan shına zańsyz engizilgeni anyqtalǵan. Tekserý barysynda 159 zań buzý deregi tirkelgen. Al ózge aımaqta ótken jyldary 200 tonnadan astam osyndaı ónim shekaradan ruqsatsyz ótkizilgen.

Qoldanylǵan shınalar — ekologıa men adam densaýlyǵyna qaýipti qaldyqtar qataryna jatady. Sondyqtan Qazaqstannyń keden zańnamasynda, sondaı-aq Eýrazıalyq ekonomıkalyq odaq aıasyndaǵy normatıvtik talaptarda bul ónimderdi el aýmaǵyna tek arnaıy ruqsat bolǵan jaǵdaıda ǵana kirgizýge jol beriledi. Atalǵan taýarlar TN SEQ kody 4012 boıynsha tirkeledi jáne olardy tasymaldaý qatań baqylaýǵa alynýy tıis.

Prokýratýra ókilderiniń aıtýynsha, zańsyz tasymaldanǵan bul qaldyqtardyń kópshiligi ishki naryqta qaıta satylýy nemese qaıta óńdeýsiz jınalýy múmkin. Bul óz kezeginde qorshaǵan ortaǵa jáne qalalyq ekologıaǵa keri áser etedi. Qoldanylǵan shınalar uzaq ýaqyt ydyramaıdy, quramyndaǵy ýly zattar topyraq pen jer asty sýlaryna áser etip, túrli aýrýlardyń taralýyna túrtki bolýy múmkin.

Mamandar bul máselege jaı ǵana keden buzýshylyǵy retinde emes, ekologıalyq jáne qoǵamdyq qaýipsizdik turǵysynan qaraýǵa shaqyrady. Shına qaldyqtary baqylaýsyz óńdelse nemese durys joıylmasa, órt shyǵý qaýpi, sondaı-aq aýany lastaý deńgeıi kúrt artady. Sonymen qatar, bul salada kóleńkeli bıznestiń órship otyrǵanyn da kórsetedi.

Qazirgi ýaqytta Bas kólik prokýratýrasy men ekologıalyq qadaǵalaýshy organdar ekologıalyq normalardy buzǵan tulǵalar men kompanıalardy anyqtaý jumystaryn júrgizip jatyr. Qoldanylǵan shınalardy zańsyz ákelip, ony zańsyz jolmen ótkizgenderge qatysty ákimshilik jáne qylmystyq jaýapkershilik qarastyrylǵan.

Memlekettik organdar el azamattaryn jáne kásipkerlerdi bul másele boıynsha qyraǵy bolýǵa shaqyryp, qoldanylǵan ónimderdi satyp almas buryn onyń zańdylyǵyna, shyǵý tegi men ekologıalyq qaýipsizdigine nazar aýdarýǵa keńes beredi.