InfoHub Logo

Memleket basshysynyń jarlyǵymen Erbolat Dosaev Almaty qalasynyń ákimi laýazymynan bosatyldy. Ol bul qyzmetti 2022 jyldyń aqpan aıynan bastap úsh jylǵa jýyq ýaqyt atqardy.

Erbolat Asqarbekuly Dosaev — tájirıbeli memleket qaıratkeri ári qarjy salasynyń bilikti mamany. Ol Almatydaǵy Respýblıkalyq fızıka-matematıka mektebiniń túlegi, 1993 jyly Almatylyq energetıka ınstıtýtyn támamdaǵan.

Kásiptik jolyn jeke sektorda bastap, 1997 jyly «Aksept» korporasıasynyń bas dırektory boldy. Keıin «Bank Týran-Alem» basqarma tóraǵasynyń orynbasary, sondaı-aq «Almatınskıı torgovo-fınansovyı bank» basqarma tóraǵasy qyzmetterin atqardy.

1998 jyly Úkimet keńesshisi, keıin Energetıka, ındýstrıa jáne saýda vıse-mınıstri, 2000 jyly Qarjy vıse-mınıstri qyzmetterin atqardy. 2001 jyly «Qazaqstan Damý Banki» dırektorlar keńesiniń tóraǵasy, sondaı-aq Tabıǵı monopolıalardy retteý agenttiginiń tóraǵasy boldy.

2003 jyly Qarjy mınıstri, 2004 jyly Densaýlyq saqtaý mınıstri bolyp taǵaıyndaldy. Keıingi jyldary «KazInvestBank» dırektorlar keńesin basqardy, al 2012 jyldan bastap Ekonomıkalyq damý jáne saýda mınıstri, Ulttyq ekonomıka mınıstri qyzmetterin atqardy.

2016 jyly «Báıterek» ulttyq basqarýshy holdıńin basqarsa, 2017 jyly Premer-mınıstrdiń orynbasary boldy. 2019–2022 jyldary QR Ulttyq bankiniń tóraǵasy qyzmetinde jumys istedi.

Erbolat Dosaevtyń Almaty qalasyn basqarý kezeńi túrli reformalar men ýrbanıstik jobalarmen este qaldy. Endi onyń ornyna jańa ákim taǵaıyndalady dep kútilýde.