InfoHub Logo

Almatynyń bas gazeti sanalatyn «Almaty aqshamy» basylymynda aýqymdy kadrlyq ózgeris boldy. «Alatau Aqparat» medıa holdıńiniń sheshimimen gazet tizgini jańa, biraq ujymǵa etene tanys, tájirıbeli mamandarǵa senip tapsyryldy. Bul týraly Infohub.kz aqparattyq portaly habarlaıdy.

Holdıń dırektory Erjan Qalymbaıulynyń buıryǵymen basylymnyń bas redaktory qyzmetine belgili jýrnalıs Estaı Bojan taǵaıyndaldy. Medıa salada ózindik qoltańbasy qalyptasqan, qalamy júırik qalamger endi megapolıstiń tynys-tirshiligin jazatyn tarıhı gazettiń jumysyn jandandyrmaq.

Basshylyq quramdaǵy ózgeris tek birinshi tulǵamen shektelgen joq. Redaksıa jumysyn jańa deńgeıge kóterý maqsatynda bas redaktordyń orynbasary bolyp Serik Jumabaev bekitilse, basylymnyń jaýapty hatshysy qyzmeti Quralaı Imanbekqyzyna júkteldi. «Alatau Aqparat» basshylyǵynyń pikirinshe, bul taǵaıyndaýlar kezdeısoq emes. Jańa komandanyń úsh múshesi de «Aqshamnyń» óz qazanynda qaınap, ystyq-sýyǵyna tóselgen kásibı kadrlar. Olardyń biliktiligi basylymnyń dástúrli qundylyqtaryn saqtaı otyryp, ony zaman talabyna saı túletýge múmkindik beredi degen senim zor.

Aıta keteıik, «Almaty aqshamy» – qazaq baspasózindegi orny erekshe, biregeı mektep. Kezinde Erǵalı Saǵat, Qalı Sársenbaı syndy ulttyq jýrnalısıkanyń marǵasqalary basqarǵan basylymnyń jaýapkershiligi qashanda aýyr bolǵan. Osy ýaqytqa deıin gazetti abyroımen basqaryp kelgen Tórehan Danıarov qurmetti eńbek demalysyna shyqty. Áriptesteri men medıa qaýymdastyq ardager jýrnalıske gazettiń damýyna qosqan súbeli úlesi úshin alǵys bildirip, zeınet jasyndaǵy jańa kezeńine sáttilik tiledi.