InfoHub Logo

Forbes Kazakhstan jýrnaly 2026 jylǵy eń baı bıznesmender reıtıńin jańartty. Bıylǵy tizimge qurylys, avıasıa, bilim berý jáne aýyl sharýashylyǵy salalarynda eńbek etip júrgen alty jańa esim qosyldy.

Bul týraly Infohub.kz aqparat agenttigi habarlaıdy.

Shahmurat Mútálip: Altyn óndirisindegi jańa oıynshy

Reıtıńke alǵash ret engen kásipkerlerdiń qatarynda Shahmurat Mútálip bar. Ol birden 22-satyǵa jaıǵasyp, 482 mln dollar baılyǵymen erekshelendi. Buǵan deıin Mútálip Integra Construction KZ kompanıasy arqyly iri temirjol, avtokólik joldary jáne logıstıkalyq keshender salýmen aınalysqan bolatyn. Alaıda bıyl ol «Altynalmas» altyn óndirý kompanıasynyń 100% aksıasyn satyp aldy. Sonymen qatar, kásipker «Kazmyrysh» kompanıasy men Eurasian Resources Group (ERG) holdıńiniń 40% úlesin ıelenýge nıetti.

Vladımır Sytnık pen Aıǵazy Qusaıynov: Avıasıa men bilim salasy

SCAT áýe kompanıasynyń teń ıegeri (43%) Vladımır Sytnık 143 mln dollar baılyǵymen tizimniń 63-shi ornyna turaqtady. Odan keıingi 64-shi satyda 132 mln dollar dáýletimen Aıǵazy Qusaıynov keledi. Qusaıynovtyń negizgi aktıvteri bilim berý jáne shıkizat sektorynda shoǵyrlanǵan. Ol tanymal KazGASA jáne Qazaqstan-Amerıkan ýnıversıtetine ıelik etetin International Educational Corporation kompanıasyn basqarady.

Bekjan Mamyt: Bıtým jáne munaı óńdeý

Tizimniń 66-shy ornyna Bekjan Mamyt jaıǵasty. Onyń 130 mln dollar kapıtaly negizinen Qazaq Bitum kompanıasymen baılanysty. Kásipkerdiń menshigindegi kompanıa munaı óńdeý, bıtým materıaldaryn shyǵarý jáne asfáltbeton qospalaryn óndirýmen aınalysady. Sondaı-aq, onyń qurylymyna Kaz Petroleum Group munaı óńdeý zaýyty men Monotrans logıstıkalyq kompanıasy kiredi.

Iýrıı Shaı: Alataý qalasynyń ınvestory

Belgili kásipker Iýrıı Shaı 100 mln dollar baılyǵymen reıtıńtiń 72-shi satysyna endi. Onyń Caspian Group kompanıasy – jańadan boı kóterip jatqan Alataý qalasynyń negizgi ınvestorlarynyń biri. Shaı qytaılyq seriktesterimen birge Iconic Towers turǵyn úı keshenin salýdy josparlap otyr. Budan bólek, onyń beton óndiretin zaýyttarda jáne Qostanaıdaǵy bolat prokat zaýytynda (Caspian Steel QZ) úlesteri bar.

Bahtıar Ospanov: Aýyl sharýashylyǵynyń alyby

Jańa esimderdiń tizimin jáne jalpy Forbes reıtıńin 95 mln dollar baılyǵy bar Bahtıar Ospanov qorytyndylaıdy. Ol «Qazaqstannyń astyq konsorsıýmyn» basqarady. Kásipkerdiń ıeliginde 22 aýyl sharýashylyǵy kásiporny, alty elevator men eki dıirmen kesheni bar. Ospanovtyń bıznesi negizinen elimizde astyq, burshaq jáne maıly daqyldardy ósirýge baǵyttalǵan.