tengrinews.kz
Irandyq sýpertanker AQSH-tyń Ormýz buǵazyndaǵy teńiz blokadasyn buzyp ótti
Irannyń eki mıllıon barel munaı tasymaldaı alatyn sýpertankeri AQSH-tyń Ormýz buǵazyndaǵy teńiz blokadasyn sátti eńserdi. Bul týraly Fars aqparat agenttigine silteme jasap Infohub.kz habarlaıdy.
Agenttiktiń málimetinshe, sanksıa tizimindegi tanker ashyq teńizben Ormýz buǵazyn kedergisiz, óziniń geolokasıa júıesin qosyp ótken.
Keıinirek atalǵan aqparat quraly portqa baǵyt alǵan azyq-túlik tıelgen keme týraly da habarlady. Buǵan deıin Bloomberg agenttigi Qytaımen baılanysy bar Rich Starry tankeriniń de Ormýz buǵazynan ótkenin jazǵan.
The Wall Street Journal gazetiniń habarlaýynsha, AQSH áskerıleri Ormýz buǵazyn blokadaǵa alǵan alǵashqy táýlikte odan 20-dan astam komersıalyq keme ótken.
AQSH Ortalyq qolbasshylyǵynyń basshysy Bred Kýper bolsa, amerıkalyqtar Iranǵa baratyn jáne Irannan shyǵatyn teńiz saýdasyn tolyq toqtatty dep málimdedi.
AQSH Ormýz buǵazyna teńiz blokadasyn Iranmen ótken aptada ótkizilgen kelissózderdiń birinshi kezeńinen keıin jarıalady. Kelissózder nátıjesinde Tegeran birneshe mańyzdy másele boıynsha kelisimge kele almaǵanyn habarlady. Vashıngtonnyń aıtýynsha, bul máselelerdiń qatarynda baıytylǵan ýran da bar, ony AQSH Irannan alyp qalýdy talap etip otyr.
Blokada seısenbi keshkisin kúshine endi. Prezıdent Donald Tramp amerıkandyq áskerıler bul baǵytty paıdalanýǵa tyrysqan barlyq kemelerdi toqtatatynyn eskertti. Sondaı-aq, Iranǵa ótý úshin aqy tólegen kemelerdi baqylaýǵa jáne ustaýǵa tapsyrdy.
-
Almatydaǵy ıpodromdy qala syrtyna kóshirý nemese jekemenshikten satyp alý týraly usynystarǵa Jetisý aýdanynyń ákimi Lázzat Jylqybaeva pikir bildirdi.
-
Tanymal jýrnalıs Dınara Sátjan jaqyn qurbysy Baıan Maqsatqyzy men kásipker Tursen Alagózovtiń jańa úıine qonaqqa baryp, onyń ereksheligin aıtyp, kópshiliktiń qyzyǵýshylyǵyn týdyrdy.
