InfoHub Logo

Jazǵy demalys qarsańynda Qazaqstannyń İshki ister mınıstrligi mektep oqýshylary men stýdentterge úndeý tastady. Mınıstrlik ınternettegi «ońaı tabys» týraly jalǵan usynystarǵa aldanyp qalmaýǵa shaqyrdy.

Bul týraly Infohub.kz aqparat agenttigi habarlaıdy.

Internettegi «ońaı jumys» – qaýipti arna

İshki ister mınıstrliginiń málimetinshe, jaz aılarynda áleýmettik jelilerde jáne ınternette «esh qıyndyqsyz tez aqsha tabý» týraly jarnamalar jıi paıda bolady. Alaıda, bul usynystardyń kóbi esirtki zattaryn taratý, jarnamalaý jáne tasymaldaý sıaqty zańsyz árekettermen baılanysty ekeni anyqtaldy.

Esirtki qylmysyna qarsy is-qımyl komıteti tóraǵasynyń orynbasary Qýandyq Aljanov bul áreketterdiń qanshalyqty qaýipti ekenin atap ótti. Ol 16 jastan bastap esirtki qylmystary úshin qylmystyq jaýapkershilik bolatynyn eske saldy.

«Bostandyq aqshadan qymbat»

«Bir sáttik «ońaı jumys» búkil ómirińdi kúıretýi múmkin. Eger sizge kúmándi jumys usynylsa, bas tartýǵa shaqyramyz. Jyltyraǵan jalǵan aqsha úshin bostandyǵyńyzdy, taǵdyryńyzdy jáne ómirińizdi táýekelge tikpeńiz. Aqylmen tańdaý jasańyz – bir jazǵa emes, ómir boıyna. Bostandyq aqshadan qymbat. Bolashaq paıdadan mańyzdy», – dedi Qýandyq Aljanov.

Mınıstrlik esirtkige qatysty qylmystar úshin jazanyń óte qatań ekenin jáne ómir boıyna bas bostandyǵynan aıyrýdy qamtýy múmkin ekenin basa aıtty.